Almatynyń 2 548 turǵyny úıden daýys berýge ótinish bildirgen

ALMATY. QazAqparat – Almatynyń 2 548 turǵyny úıden daýys berýge ótinish bildirgen, onyń 1299-y daýys berip úlgerdi. Bul týraly brıfıng barysynda aýmaqtyq referendým komıssııasynyń tóraǵasy Janna Asanova málim etti, dep habarlaıdy QazAqparat tilshisi.

«Daýys berý jalǵasyp jatyr. Ýchaskelik komıssııa músheleri azamattardyń ótinishi boıynsha úı-úıdi aralap, daýystaryn qabyldap jatyr. Daýysty úıden berý boıynsha 2 548 ótinish kelip tústi. Osy sátke deıin 1 299 adam daýys berip úlgerdi. Eń kóp ótinish Áýezov aýdanynan tústi – 864, eń azy Naýryzbaı aýdanynan boldy», - deıdi Janna Asanova.

Sonymen qatar, ol múmkindigi shekteýli azamattar 97 ınvotaksıdiń qyzmetine júgingenin atap ótti.

«Saǵat 14:00-degi jaǵdaı boıynsha halyqtyń 23,6%, ıaǵnı 265 892 adam daýys berýge keldi», - dedi spıker.

Aıta ketsek, Almatyda 1,1 mln astam adam daýys berýge quqyly. Megapolıste 574 referendým ýchaskesi ashyq. Referendým ýchaskesine alǵashqylardyń biri bolyp Almaty qalasynyń ákimi Erbolat Dosaev jubaıymen birge keldi. Olar Mánshúk Mámetova atyndaǵy №28 mektep-lıtseıde ornalasqan №358 referendým ýchaskesinde daýys berdi.