Almatynyń 1000 jyldyǵyna oraı, «Medeý» saıabaǵynda 1000 túp aǵash kóshetteri otyrǵyzyldy (FOTO)
ALMATY. QazAqparat - Búgin Almaty irgesindegi «Medeý» Memlekettik óńirlik tabıǵı saıabaǵynda «Almatynyń 1000 jyldyǵyna - 1000 ıgilikti is» sharasy aıasynda 1000 túp aǵash kóshetteri otyrǵyzyldy.
Іs-sharaǵa 500-den astam adam: «Medeý» saıabaǵynyń qyzmetkerleri, stýdent jastar, volonterler, jastar uıymdarynyń belsendileri, sondaı-aq, Almaty qalalyq máslıhatynyń depýtaty, jas akter Asylhan Tólepov bastaǵan jas ánshiler men teatr jáne kıno akterlary qatysty.
«Bul shara Almaty qalasynyń 1000 jyldyq mereıtoıyna arnalyp otyr. Maqsatymyz - qalanyń ishki jaǵyn jáne aınalasyn jasyl jelekke toltyrý. Óıtkeni, Almaty sonaý keńes zamanynyń ózinde eń bir kógaldandyrylǵan qalalardyń biri atanyp keldi. Biz osy dástúrdi qazir de jalǵastyrýymyz kerek. Búgin kún bulttanyp, jańbyr sirkirep tursa da jastar kóptep keldi. Maǵan ánshiler men kıno jáne teatr salasyndaǵy áriptesterim qoldaý kórsetti», - dedi A. Tólepov.
Uıymdastyrýshylardyń aıtýynsha, bul shara qala turǵyndaryn tabıǵatty aıalaı bilýge, qalanyń ekologııalyq ahýalyna beı-jaı qaramaýǵa shaqyrady.
«Almatynyń mereıtoıy jáne «Medeý» saıabaǵyn damytýdyń keshendi josparyna sáıkes, biz qazir apta saıyn senbilik ótkizip jatyrmyz. Biraq, búgingi kún erekshe - óıtkeni, búgin biz 1000 túp qylqan japyraqty jáne japyraqty aǵashtardyń kóshetterin otyrǵyzdyq. Endi saıabaqta aǵash otyrǵyzý jumystary aldaǵy maýsym aıynyń basyna deıin jalǵasady», - dedi «Medeý» memlekettik óńirlik tabıǵı saıabaǵynyń dırektory Samǵat Ermekbaev. 
