Almatyny jaıly qalaǵa aınaldyrý úshin qandaı sharalar atqarylýda
ALMATY. QazAqparat - Almaty ákimi Baýyrjan Baıbek jumys sapary kezinde qalany abattandyrý boıynsha buryn bergen tapsyrmalarynyń oryndalý barysyn tekserdi, dep habarlaıdy QazAqparat tilshisi.
Qala basshysy buryn Jeltoqsan kóshesin aralaǵan kezde «Táýelsizdik tańy» monýmenti janyna shaǵyn qaýipsizdik aımaǵyn jasaýdy tapsyrǵan edi.
Eger buryn kólik qozǵalysy bóligi eskertkishpen túıisip tursa, endi shaǵyn aımaqqa kespe tas tóselip, qozǵalys qaýipsizdigi qamtamasyz etildi.
Al Abaı dańǵylynyń birqatar bóligine, sonyń ishinde Lermontov atyndaǵy orys drama teatrynyń aldyna granıtti trotýar plıtkasy tóseldi, jáne jasyl jelek kólemi artty. Teatr aldyndaǵy sýburqaq iske qosyldy.
Qalany qaıta jańǵyrtý barysynda Ulttyq kitaphana men Baıseıitova kóshesi arasyndaǵy burynǵy rezervýardyń ornyna jańa sýburqaq paıda boldy.
Kedergisiz keńistikti ulǵaıtý úshin pandýstardyń sany kóbeıdi. Mysaly, Sport pen týrızm akademııasy aldyndaǵy jańa sýburqaqqa múmkindigi shekteýli adamdar qınalmaı túsetin bolady. Kólik qozǵalysy bóligine jaqyn ornalasqan beketter qaýipsizdik úshin aýystyryldy, jolaýshy aǵyny kóp jerlerge qosymsha beketter jasalady.
Qalany aralaǵan Baýyrjan Baıbek kásipkerlermen júzdesip, qaıta jasalǵan dańǵyldarda ornalasqan saýda obektilerin kórdi.
Abylaı han dańǵylyndaǵy «Lakomka» kondıter dúkeniniń satýshysy jóndeý jumystarynan soń jáne uzaq ýaqyt boıyna bos turǵan sýburqaqtyń iske qosylýy barysynda kelýishilerdiń edáýir kóbeıgenin aıtty.
Bir aı buryn ǵana jańarǵan «Almaty kitap» dúkeniniń satýshysy Natalıa Koh Abaı dańǵylyn rekonstrýktsııalaýdyń arqasynda kitapqa degen qyzyǵýshylyqtyń artqanyn jetkizdi.
«Sizder syrtty jańalasańyzdar, biz ishti árleýdemiz. Onyń barlyǵy oń nátıje berýde. Jańarǵan jerlerde serýendeýshiler sany artty, kitap vıtrınasyna kóz salyp, kelýshiler de kóbeıdi», - dedi Natalıa Koh.
Aıta keterligi, qazirgi kezde jańarǵan dańǵyldarǵa aǵash otyrǵyzý, zamanaýı kóshe jıhazdaryn qoıý jumystary bastaldy. Kóshe men trotýarlardyń jaryq kózderi modernızatsııalanýda. Alynǵan baǵanalar qalaǵa qosylǵan eldi mekenderge ornatylýda.
Bulardan ózge, qala keńistigin jaqsartý aıasynda megapolıstiń tarıhı ortalyǵynyń úshten ekisi jańardy, 524 kóshe men 1400 eski aýlalar qaıta jasaldy. 300 km aryq, 800 km astam ınjenerlik júıe rekonstrýktsııalandy.
Jyl aıaǵyna deıin qalanyń jaryq kózderiniń úshten biri dıodty jáne energııany jınaqtaýshy shamdarǵa aýystyrylady, jańarǵan qoǵamdyq kóliktiń úlesi 80%-ǵa jetedi.
Osyǵan deıin Almatyda 1400 aýlaǵa jańa jaryqtandyrý júıeleri ornatylǵandyǵyn habarlaǵan bolatynbyz.
