Almatyny selden qorǵaý jumystary qalaı júrip jatyr - TJD jaýaby
ALMATY. QazAqparat - Almatyda qala ákiminiń orynbasary Marat Dáribaevtyń tóraǵalyǵymen kóktemgi tótenshe jaǵdaılardyń aldyn alý boıynsha arnaıy komıssııanyń otyrysy ótti, dep habarlaıdy QazAqparat tilshisi.
«Ótken jyldardaǵy tájrıbeni eskere kele, sel bolý jaǵdaılaryna júıeli taldaý jasaldy. Jedel ahýal kartasy quryldy. Almatyda 67 sý tasý qaýpi bar núkte belgilendi. Olardyń 70 paıyzy qalaǵa jaqynda qosylǵan terrıtorııada ornalasqan. Búginde 30 ýchaskede jumys júrgizilip, qaýip seıildi», - dedi qalalyq TJD basshysy Serik Áýbákirov.
Aıta ketý kerek, qalada tótenshe jaǵdaılardyń aldyn alýǵa 7,5 mlrd teńge qarastyrylǵan. Bul ótken jylmen salystyrǵanda 1,4 ese artyq.
Atap aıtqanda, Úlken Almaty ózeniniń sýyn turaqtandyryp, Ermensaı, Kereńqulaq ózenderiniń jaǵasyn bekitýge 400 mln teńge bólindi.
2017-18 jyldary ákimdik Alataý, Áýezov, Almaly, Bostandyq, Medeý aýdandarynda 30 shaqyrym aryq jelisin jańartyp, Esentaı (9 km), Kimasar (1,1 km) Jarbulaq (0,4 km) ózenderiniń belgili bir uzyndyǵy qaıta bekitildi.
Alataý jáne Naýryzbaı aýdandarynda 12,3 km bolatyn aryq jáne sý aǵyzý jelisi salyndy.
Naýryzbaı aýdanynda Qarǵaly ózeniniń 7,7 shaqyrymyn jóndeýge 2,2 mlrd teńge jumsaldy.
Sonymen qatar, Almaty qalasynyń erte kóktemdegi qaýipsizdigin qamtamasyz etý maqsatynda 2018 jyly 5,5 myń qyzmetker, 1716 tehnıka jumyldyryldy.
«2017-2018 jyldardaǵy sý alý qaýpiniń aldyn alý» jol kartasyna sáıkes jergilikti bıýdjetten 52 mlrd teńge bólindi.
Qalanyń 58 kóshesinde 42 shaqyrym aryq jelisin qaıta jasaýdyń jobalyq smetalyq qujattamasy jasaldy.
2020 jyly bul kórsetkishti 44,3 shaqyrymǵa jetkizý kózdelgen.
Mamandardyń aıtýynsha, gıdrotehnologııalyq qurylǵylardyń jaǵdaıy dál qazir qanaǵattanarlyq.
Bıyl «Kókqaınar» shaǵyn aýdanyndaǵy gıdrotehnologııalyq qurylǵyny qaıta jóndeýge 129 mlrd teńge qarastyrylǵan. Sonymen qatar, Myńjylqy plotınasynyń qurylysyn aıaqtaý kózdelgen.
Sondaı-aq, Aqsaı, Aıýly shatqaldaryndaǵy 2 selden qorǵaý bógetiniń salynatyn terrıtorııa daıyndalady.
