Almatyny Naýryz meıramyna oraı bezendirýge konkýrs jarııalandy

ALMATY. QazAqparat - Almaty ákimdiginiń Mádenıet basqarmasy Naýryz meıramynda qalany bezendirýdiń eń úzdik dızaınyna konkýrs jarııalady, dep habarlaıdy QazAqparat tilshisi.

Ákimdik málimetinshe, baıqaýǵa qatysý úshin qalany bılbordtarmen bezendirýdiń erekshe kontseptsııasyn jasap, ony albom túrinde usyný qajet.

«Ótinimderdi qabyldaý 31 qańtardan bastalyp, 20 aqpanǵa deıin jalǵasady. Úzdik jumysty 21 aqpanda Dızaınerler odaǵynyń, Sýretshiler odaǵynyń, Almaty qalasy Josparlaý jáne ýrbanıstıka basqarmasynyń, sondaı-aq Almaty qalasy Mádenıet basqarmasynyń ókilderi kiretin jumys komıssııasynyń músheleri tańdaıdy.

Baıqaý nátıjeleri Almaty qalasy Mádenıet basqarmasynyń resmı saıtynda jarııalanady.
Eń úzdik dızaın qalanyń jarnama alańdarynda ornalastyrylady», - dep habarlady ákimdiktiń baspasóz qyzmetinen.
Aıta keteıik, birinshi oryn úshin júlde qory – 1 mln teńge, ekinshi oryn alǵandar – 500 000 teńge, úshinshi orynǵa laıyqtalǵandar 300 000 teńge alady.

Usynystar albom túrinde [e-mail] elektrondyq poshtasyna qabyldanady.