Almatyny kógaldandyrý boıynsha qala turǵyndarynyń usynysyn qabyldaý merzimi uzartyldy
ALMATY. QazAqparat - Almaty qalasyn kógaldandyrýdyń tujyrymdamasyna usynystardy qabyldaý 31 qazanǵa deıin uzartyldy, dep habarlaıdy QazAqparat tilshisi qalalyq ákimdiktiń baspasóz qyzmetine silteme jasaı otyryp.
«Almaty qalasyn kógaldandyrý tujyrymdamasyn ázirleý jónindegi jumys toby Almaty qalasyn kógaldandyrýdyń tujyrymdamasyna usynystardy qabyldaý 31 qazanǵa deıin uzartylǵanyn habarlaıdy», delingen habarlamada.
Buǵan deıin usynystar qabyldaý 2017 jylǵy 15 qazanǵa deıin qabyldanatyny eskertilgen.
Esterińizge salsaq, «Almaty qalasy Tabıǵı resýrstar jáne tabıǵatty paıdalanýdy retteý basqarmasy» KMM tapsyrmasy boıynsha Almaty qalasyn kógaldandyrýdyń tujyrymdamasy ázirlenip jatyr. Tujyrymdamany ázirleý úshin orman sharýashylyǵy ǵalymdary, sáýletshiler, bıologtar, ekonomıster, gıdrologtar jáne qoǵamdyq uıym ókilderinen jumys toby quryldy.
Tujyrymdama qalanyń klımat ereksheligin, topyraǵynyń quramy, jerasty sýynyń jaqyn ornalasýy deńgeıin, janýarlar dúnıesiniń bıologııalyq alýantúrliligine taldaý jasaýǵa negizdelgen.
Qalalyq ákimdiktiń habarlaýynsha, tujyrymdama egiletin aǵash-buta, ósimdik materıaldaryn tańdaý, daıyndaý jáne ony kútip baptaý ádistemesinen, saıabaqtar, aýla ishindegi aýmaqtar, sanıtarlyq qorǵanys aımaǵyna arnalǵan biryńǵaı qalalyq kógaldandyrý júıesinen quralyp, qala aýmaǵyn abattandyrý jáne kógaldandyrý júıesin damytý jónindegi Almaty qalasynyń baǵdarlamasyn ázirleýge, Almaty qalasynyń aýmaǵynda óziniń qyzmetin júzege asyryp júrgen kásiporyndar men uıymdardyń qyzmetine negizdeme bolady.
Tujyrymdama ázirleýdegi taǵy bir maqsat - burynnan bar jasyl jelekterdiń kúıin jaqsartý jáne jalpy paıdalanýdaǵy jasyl jelekterdiń bir adamǵa shaqqandaǵy kólemin 13 sharshy metrge deıin arttyrý.Almaty qalasynyń turǵyndary atalǵan Tujyrymdamaǵa qatysty usynystaryn a@conga.kz adresine jibere alady.
Eske sala keteıik, «Almaty -2020» damytý baǵdarlamasynda Almatynyń qorshaǵan ortasy qazirgi álemdik talaptarǵa saı keletin adamdardyń ómir súrýine qolaıly qala bolýǵa tıis ekeni jazylǵan.
«Atmosferanyń lastaný deńgeıi 140 mkg/m3-dan 36 mkg/m3, qalanyń ІAÓ-niń energosyıymdylyǵy 2020 jyly 0,3 shjt/mln. doll. bolady.
Osyǵan oraı aýaǵa taratý kózderin monıtorıngileý men tabıǵat qorǵaý polıtsııasynyń qyzmetin jandandyryp, kásiporyndardyń aýaǵa taratýyn tómendetý boıynsha sharalardy qabyldaýdy Qazaqstannyń ekologııalyq kodeksi normalaryna engizýdi qamtamasyz etý qajet. Jeke turǵyn úılerdi gazdandyrý, JEO-tarda tazartýshy qondyrǵylardy montajdaý, shaǵyn jáne orta qazandyqtardy tabıǵı gazǵa nemese elektr qýatyna aýystyrý josparlanýda.
Investorlardy tarta otyryp, turmystyq qatty qaldyqtardy qaıta óńdeý men káriz tazartý boıynsha qýat kózderin qalyptastyrý josparlanyp otyr. Nátıjesinde qaldyqtardy qaıta óńdeý 2020 jyly 5%-dan 40%-ǵa deıin ósýi tıis.
Qalany kógaldandyrý boıynsha landshaftyq dızaın, jasyl-jelekterdi otyrǵyzý men kútim salasynyń tıisti mamandary tartyla otyryp, júıeli sharalar iske asyrylady, jasyl aımaqtardy zańdastyrý men túgendeý júrgiziledi, qajetti sýarý jelileri salynady jáne t.b.
Saıran kóli, Bas botanıkalyq baq, Ortalyq mádenıet jáne demalys saıabaǵy, Almaty haıýanattar baǵy jáne basqa da jasyl aımaqtardy jańartý boıynsha ınvestıtsııalyq jobalardy júzege asyrý josparlanyp otyr. Qala aýmaǵyn sý basý máselesin sheshý úshin ózen arnalaryn jańartý, sý qorǵaý aımaqtaryn kóriktendirý, aryq jelileri men nóser kárizderin salý jalǵastyrylady», - delingen habarlamada.
Sondaı-aq, www.conga.kz saıtynda qosymsha aqparatpen tanysýǵa bolady.
