Almatyny kartop, kókónis, et, jumyrtqa, jemis-jıdek jáne júzimmen 80 paıyzǵa qamtamasyz etip otyrmyz - A. Musahanov
ASTANA. 22 qarasha. QazAqparat - Almaty qalasy mańyndaǵy azyq-túlik beldeýin damytý baǵdarlamasy sheńberinde jáne azyq-túliktik qaýipsizdik maqsatynda edáýir jumystar qolǵa alyndy.
Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Almaty oblysynyń ákimi Ańsar Musahanov aıtty. «Búgingi kúni biz Almaty qalasyn kartop, kókónis, et, jumyrtqa, jemis-jıdek jáne júzimmen - 80 paıyzǵa, sútpen 40 paıyzǵa qamtamasyz etip otyrmyz. «Sybaǵa» baǵdarlamasyna sáıkes 21 óńdeýshi kásiporyn, 15 zamanaýı jylyjaı men qoımalar, 4 sút fermasy men maı bordaqylaý keshenderi paıdalanýǵa berildi. 400-den astam jylyjaı men 28 kókónis saqtaý qoımalary jumys istep tur. Aýyl sharýashylyǵy ónimderin óńdeıtin 877 kásiporynda azyq-túliktiń 70-ten astam túri shyǵarylady», - dep atap ótti A. Musahanov.
