Almatyny energııamen qamtıtyn 33-podstansa iske qosyldy

Jańa energııa nysanynyń iske qosylýy - 2008 jyly bastalǵan Almaty qalasyn elektrmen ornyqty jabdyqtaý baǵdarlamasyn tolyq aıaqtaýǵa múmkindik berdi.

«Túrksib» qosalqy stantsııasy transformatorlyq qýatty 30 MVA-ǵa arttyrady jáne Túrksib aýdanynyń ortalyq bóligin, sondaı-aq «Qol jetimdi baspana» baǵdarlamasy aıasynda salynǵan «Jas Qanat» jańa shaǵyn aýdanyn, «Almaty aglomeratsııasynyń 2030 jylǵa deıingi óńiraralyq shemasy» baǵdarlamasy boıynsha qalaǵa qosylǵan «Qaırat» shaǵyn aýdanynyń negizgi bóligin elektrmen qamtamasyz etpek. 

«Samuryq-Qazyna» UÁQ» AQ Basqarma Tóraǵasy Ahmetjan Esimov elimizdiń eń iri megapolısin energııamen úzilissiz qamtamasyz etý máselesine úlken mán beriletinin, endigi jalǵyz mindet - osy qýat kózderin durys paıdalaný ekenin atap ótti.

«Memleket basshysy osydan on jyl buryn alǵa qoıǵan mindetterdiń biri - Almaty qalasyn elektrmen ornyqty jabdyqtaý bolatyn. Búgin, qosalqy stantsııanyń iske qosylýymen bul másele tolyq sheshildi.  Endigi qalǵan jalǵyz mindet - osy qýat kózderin durys paıdalaný, óıtkeni jumsalǵan 20 mlrd teńgeden astam qarajat tıimdi jumys isteýi kerek», - dedi Ahmetjan Esimov.

33-shi qosalqy stantsııa iske qosylǵannan keıin, Almaty qalasynyń sheginde energııamen jabdyqtaý kartasy  tolyǵymen «jasyl túske» boıalady.  Bul qala aýmaǵynda elektr energııasy tolyq jetkilikti ekenin bildiredi.

«Esterińizde bolar, osydan 10 jyl buryn jaryqty kezek-kezegimen, avarııalyq túrde sóndirip, elektrmen ornyqty jabdyqtaı almaıtynbyz, bul qalanyń jáne bıznestiń damýyna kedergi keltirip, halyqtyń áleýmettik jaǵdaıyna áser etetin», - dep atap ótti A.Esimov.

Sondaı-aq, Ahmetjan Esimov Almaty qalasyna jumys sapary barysynda qaladaǵy energetıkalyq keshenniń ornyqty damýy úshin úlken mańyzǵa ıe «Alataý Jaryq Kompanııasy» AQ-nyń energııa obektilerinde boldy. A.Esimov júktemeni PS-220/110/10 kV №131A «Taýly qyrat» qosalqy stantsııasynan PS-220/110/10-10 kV №160A «Ermensaı» qosalqy stantsııasyna aýystyrý jumystarymen tanysty. Bul joba «Taýly qyrat» qosalqy stantsııasy ornalasqan aýmaqta laı kóshkini bolǵan jaǵdaıda, qosalqy stantsııanyń qıraý jáne tutynýshylardyń elektrden jappaı aǵytylý qaýpi týyndaýyna baılanysty iske asyrylýda. Avarııalyq jaǵdaılardy boldyrmaý maqsatynda, júktemeni «Gornyı gıgant» shaǵyn stantsııasynan «Ermensaı» qosalqy stantsııasyna aýystyrý týraly sheshim qabyldanǵanyn aıta keteıik. 

2011 jyly «Ermensaı» QS iske qosylýy Almaty qalasynda Qysqy Azıada-2011 oıyndary ótkizilýine oraılastyrylǵan bolatyn. Júktemelerdi aýystyrý jobasyn aıaqtaý 2018 jylǵa josparlanǵan, sodan keıin «Taýly qyrat» QS joıylady.

"Quny 7045,84 mln teńge bolatyn Ermensaı jobasy 2016 jyly ashylǵan.   «Jas Kanat» podstansasy jobasy 2007 jyly qolǵa  alynǵan. Oǵan Almaty ákimdigi,  «Samuryq-Kazyna»,  «Samuryq-Energo» AQ qarjy saldy. 33-podstansa  zamanaýı tehnıkamen jabdyqtalǵan», - dedi «Samuryq-Qazyna» AQ  óndiris boıynsha basqarýshy  dırektory Serik Tıýtebaev.

Sondaıaq,  onyń aıtýynsha,  jaqynda  KEGOC Soltústik--shyǵys-ońtústik baǵytynda Ekibastuzdan elektr energııasyn tartý jobasyn aıaqtap keledi.

Bul Almaty tutynýshylaryn elektr energııasymen úzilissiz qamtýǵa septigin tıgizbek.