Almatyny damytý draıveriniń biri týrızm bolýy tıis - Qyryqbaev
ALMATY. QazAqparat - Almatyda 600-ge jýyq týrıstik kompanııa bar. Jyl basynan beri 200 myń adam Almatyǵa qonaqqa keldi. Almatylyqtar bıznespen aınalysýǵa barynsha beıim, - dedi Almaty qalasy ákiminiń orynbasary Arman Qyryqbaev búgin ashylǵan halyqaralyq «International Mountain Sports Festival» festıvali aıasyndaǵy forýmnyń ashylýynda. Bul týraly QazAqparat tilshisi habarlaıdy.
Arman Qyryqbaev qalada medıtsınalyq, sporttyq, mádenı- tanymdyq, ekologııalyq, iskerlik, shopıngtik týrızm túrleri damyp kele jatqanyn aıtty. Ol taý týrızmine aıryqsha nazar aýdarylyp otyrǵanyn aıtty.
«Almaty - Qazaqstannyń ekonomıkalyq lokomotıvi. Almatylyqtar bıznespen aınalysýǵa beıim. Almatyda 600-ge jýyq týrıstik kompanııa bar. Bıyldyń ózinde jyl basynan beri 200 myń adam Almatyǵa qonaqqa kelgen. Memleket basshysynyń turaqty qamqorlyǵy arqasynda Almatyda zamanaýı sporttyq ınfraqurylym qalyptasty, sonyń arqasynda túrli deńgeıdegi sporttyq sharalar ótýde. Bıyl biz qalada Búkilálemdik qysqy stýdenttik oıyndardy ótkizdik, bul megapolısti álem jurtyna qysqy týrızmniń halyqaralyq ortalyǵy retinde kórsetip, buqaralyq sportty damytýǵa ári sporttyq iri jetistikterge jetýge tyń serpilis berdi», - dep atap ótti qala ákiminiń orynbasary.
Arman Qyryqbaevtyń aıtýynsha, qazirgi kezde qalada 166 qonaq úı, hostel, kempıng, 2 myńnan astam dámhana, meıramhana, 19 teatr, 20 murajaı, 14 kórkem galereıasy men kórmeler jumys isteıdi.
«2016 jyly respýblıka boıynsha shetelge 9 mln adam shyqsa, sonyń 3 mıllıonǵa jýyǵy almatylyqtar. Almatyny damytýdyń negizgi draıveriniń biri týrızm bolýy tıis, onyń ústine osy salada jańa jumys oryndaryn qurýǵa múmkindik mol», - dedi ol.
Qala basshylyǵynyń aıtýynsha, Almaty óziniń tabıǵı-geografııalyq, geosaıası ereksheligine oraı, álemdik taý týrızmin damytýǵa aıtarlyqtaı úles qosyp keledi. Mysaly, taıaýda jarııalanǵan «Worldwide Costof Living» reıtıngte Almatynyń ómir súrý men jumys isteý úshin barynsha jaıly ári arzan qala ekendigi aıtylǵan.
Aıta keteıik, búgingi halyqaralyq forýmǵa álemniń 10 elinen, sonyń ishinde Ispanııa, Germanııa, Grýzııa, Reseı, Ýkraına, Qytaı, Avstrııa jáne basqa elderden spıkerler qatysty.
«Warth» taý shańǵysy kýrorty men «Warth Holdind GmbH» basqarmasynyń bas dırektory, avstrııalyq Gıýnter Oberhaýzer kýrorttyń qala ekonomıkasyna yqpaly týraly, «PGI Management bas dırektory Djoan Vıladomat, Andorra tájirıbesi negizinde Qazaqstan taý-shańǵysy ındýstrııasyn damytý týraly aıtty. Forým barysynda qysqy sport túrleri boıynsha Qytaı qaýymdastyǵynyń bas menedjeri, Beijing Wanda Culture Industry Group bas dırektorynyń orynbasary Bın Vý Qytaıdaǵy taýshańǵysy ındýstrııasynyń damýy jóninde áńgime qozǵady.
