Almatyny 720 kún basqarǵan Baqytjan Saǵyntaev jelide jazba qaldyrdy
« Búgin men óz laýazymymdy jańa ákimge tapsyramyn. Osydan týra 720 kún buryn Prezıdent maǵan Almaty ákimdigin basqarýdy senip tapsyrdy. Bul úshin Memleket basshysyna rızamyn. Men sizdermen únemi birge boldym. Qala ómirin jaqsartýǵa bar kúsh-jigerimdi arnadym.
Uzaq merzimdi «Almaty-2050» strategııasyn qabyldap, qalany damytýdyń keleshegin aıqyndadyq. Prezıdenttiń «Shetsiz qala» qaǵıdaty negizinde qalaǵa qosylǵan aýdandardyń túıtkildi máselelerin sheshýge basa nazar aýdaryp, «Jańa Almaty» keshendi baǵdarlamasyn qabyldadyq.
Biz áleýmettik máselelerdi sheshý úshin Almatyny aglomeratsııa retinde damytý jáne oblystyń qalamen shektesetin 4 aýdanynda jumys oryndaryn qurý jumysyn kún tártibine qoıdyq.
Densaýlyq saqtaý júıesi nyǵaıtyldy. Bir jyldyń ishinde eń zamanaýı jabdyqtarmen jabdyqtalǵan 3 juqpaly aýrýlar aýrýhanasyn iske qostyq. Pandemııa kezinde densaýlyq saqtaý júıesindegi daǵdarysqa jol berilmedi»,- dep jazdy ol.
Sonymen qatar, ol mektepterdi jedel salý baǵdarlamasy qolǵa alynǵanyn tilge tıek etti.
«Tek 2021 jyly 33 jańa mektep salyndy. Bul – mektepterdegi oryn tapshylyǵyn azaıtýǵa baǵyttalǵan túbegeıli qadam boldy. Ekologııany jaqsartý úshin júıeli eki sheshim qabyldandy: mıllıon aǵash otyrǵyzý jáne ekinshi JEO-ny gazǵa aýystyrý.
Meniń árbir jumys kúnim sizderdiń kóz aldylaryńyzda ótti. Ózderińizben árdaıym kezdesip, aqyldasyp otyrdyq.
Apta saıyn Akimat Live tikeleı efırine shyqtym. Atqarylǵan sharalar týraly únemi habardar boldyńyzdar. Birge atqarylǵan jumys úshin almatylyqtarǵa alǵys aıtamyn!
Qalamyzǵa jáne barsha almatylyqtarǵa baqytty ǵumyr tileımin! Almaty máńgi meniń júregimde»,- dep atap ótti Baqytjan Saǵyntaev.
Búgin Memleket basshysynyń Jarlyǵymen Baqytjan Ábdiruly Saǵyntaev Almaty qalasynyń ákimi laýazymynan basqa jumysqa aýysýyna baılanysty bosatyldy.
Almaty ákimi bolyp Erbolat Dosaev taǵaıyndaldy.
