Almatyny 2023-2024 jyldary ShYU-nyń mádenı jáne týrızm astanasy retinde bekitý usynyldy

ASTANA. QazAqparat - 17 naýryzda Úndistannyń Varanası qalasynda Shanhaı yntymaqtastyq uıymy (ShYU) memleketteriniń týrızm ákimshilikteri basshylarynyń kezdesýi ótti.

Qazaqstandyq delegatsııany QR Mádenıet jáne sport vıtse-mınıstri Erjan Erkinbaev bastap bardy, dep habarlaıdy QazAqparat mınıstrliktiń baspasóz qyzmetine silteme jasap.

Іs-sharaǵa Úndistan, Qazaqstan, Qytaı, Qyrǵyzstan, Ózbekstan, Tájikstan, Reseı jáne Pákistan ókilderi qatysty.

Taraptar ShYU elderinde týrızm salasyndaǵy yntymaqtastyqty nyǵaıtýǵa jáne týrızm ındýstrııasyn birlesip damytýǵa baǵyttalǵan birneshe qujatqa qol qoıdy.

Vıtse-mınıstr aıtqan usynystardyń biri - iri halyqaralyq is-sharalar alańdarynda, onyń ishinde biryńǵaı stendterde ShYU memleketteriniń týrıstik áleýetin ilgeriletýdegi kúsh-jigerdi biriktirý boldy. Sondaı-aq Erjan Erkinbaev 2023-2024 jyldary Almatyny ShYU-nyń mádenı jáne týrızm astanasy retinde bekitýdi usyndy.

«ShYU elderimen barlyq salalarda yntymaqtastyqty damytý men nyǵaıtýdyń oń serpini baıqalady, bul jerde týrızm baǵyty da bar. Qazirgi ýaqytta Qazaqstanda 79 eldiń azamattaryna vızasyz rejım jumys isteıdi (ShYU-ǵa múshe barlyq memleketterdi qosa alǵanda), osy tizimdi 100 elge deıin keńeıtý baǵytynda jumys júrgizilip jatyr. Sondaı – aq 30 memleketke 100-den astam avıamarshrýt turaqty túrde áýe qatynasyn júzege asyrady», - dedi Erjan Erkinbaev.

Aıta keteıik, 2023 jyldyń shildesinen 2024 jyldyń shildesine deıin Qazaqstan Shanhaı Yntymaqtastyq Uıymyna tóraǵalyq etedi.