Almatylyqtarǵa kásip ashý úshin grant beriledi

ALMATY. QazAqparat- Almatylyqtar kásip ashýǵa grant alyp, jańa mamandyqty tegin ıgere alady. Bul týraly qalalyq halyqty jumyspen qamtý ortalyǵynyń dırektory Saǵyndyq Kenjebaev Óńirlik kommýnıkatsııalar qyzmetiniń brıfınginde aıtty, dep habarlaıdy Qazaqparat tilshisi.

Saǵyndyq Kenjebaev Almatynyń jumyspen qamtý ortalyǵy «2021-2025 jyldarǵa arnalǵan kásipkerlikti damytý jónindegi ulttyq jobany» iske asyrý aıasynda qandaı jumys atqarylǵanyn aıtyp berdi.

«Birinshiden, megapolıste jumyssyzdardy kásiptik oqytý belsendi júrip jatyr. Oqytý jumys berýshilerdiń ótinishi boıynsha oqý ortalyqtarynda jáne jumys berýshilerdiń jumys ornynda júrgiziledi. Oqý uzaqtyǵy 6 aıǵa deıin. Jobaǵa qatysýshylar oqý aqysyn tóleý boıynsha (50 myń teńge) memlekettik qoldaýmen, (20 949 teńge) stıpendııamen qamtamasyz etiledi. Oqý aıaqtalǵannan keıin jumys berýshi jumyssyzdardy alǵan mamandyǵy boıynsha turaqty jumys ornyna (keminde 12 aı merzimmen) jumysqa ornalastyrýǵa mindettenedi»,- dedi spıker.

Aıtýynsha, bıyl 25 mamandyq boıynsha 1002 adamdy oqytý josparlanǵan, búgingi tańda kásiptik oqytý kýrstaryna 1003 adam jiberildi, onyń ishinde 659 adam oqýdy aıaqtady, 499 adam alǵan mamandyǵy boıynsha turaqty jumys oryndaryna ornalasty. Budan basqa, jappaı kásipkerlikti damytý sheńberinde aılyq eseptik kórsetkishtiń 400 eselengen mólsherine deıin (1 225 200 teńge) memlekettik granttar berý kózdelgen - bul jańa bıznesti bastaý jáne damytý úshin qaıtarymsyz negizde beriletin bastapqy kapıtal. Grant qarajaty isin jańa bastaǵan jas kásipkerlerge, sondaı-aq jekelegen áleýmettik sanattarǵa jatatyn adamdarǵa (29 jasqa deıingi jas kásipkerler, AÁK jáne kóp balaly retinde, asyraýshysynan aıyrylǵanǵa baılanysty járdemaqy alýshylar, qandastar, múgedek balany tárbıelep otyrǵan múgedektigi bar adamdar) ózderiniń bıznes-áleýetin iske asyrýǵa, óndiristi jolǵa qoıýǵa jáne damytýǵa, sonymen qosa ózin turaqty tabyspen qamtamasyz etýge múmkindik beredi»,- deıdi ol.

Aıta keteıik, granttar kelesi baǵyttardy damytýǵa ǵana beriledi: qajetti qural-saımandardy, eńbek quraldaryn, tehnologııalyq jabdyqtardy, janýarlardy, maldy, qusty, kóshetterdi, butalardy, tuqymdardy, satyp alý, úı-jaıdy jalǵa alý aqysyn tóleý.

«Granttar tutyný maqsattaryna, kredıttik qaryzdardy óteýge, turǵyn úı jyljymaıtyn múligin satyp alýǵa jáne salýǵa, jer ýchaskelerin satyp alýǵa, aktsızdeletin ónim óndirýge berilmeıdi»,- dep túsindirdi spıker.

Búgingi tańda memlekettik granttardy 483 úmitker aldy. Taǵy 1086 úmitkerge berý josparda.