Almatylyqtarǵa kásibin ashý úshin jeńildetilgen nesıe beriledi
ALMATY.QazAqparat - Almatyda bıyl alǵash ret «Bastaý» jobasy qolǵa alyndy. Bul jobanyń basty ereksheligi – kez kelgen jumyssyz nemese aýyldan kelip, jeke isimen aınalysqandar, jasyna qaramastan kásipkerlik negizderin oqyp, óz isin ashý úshin jeńildetilgen nesıe alady. Bul týraly Almaty qalasy ákimdiginiń baspasóz ortalyǵynda ótken brıfıngte «Atameken» Kásipkerler palatasynyń dırektory Narıman Ábilshaıyqov aıtty, dep habarlaıdy QazAqparat tilshisi.
Kýrsqa qatysýǵa nıet bildirgenderge testileý 6-7 qyrkúıekte bastalady. Tyńdaýshylar úshin joba tegin, tipti oǵan qatysýshylarǵa birrettik stıpendııa beriledi.
«2018 jyly «Bastaý» jobasy aıasynda respýblıkada 28 myń adam oqydy, onyń ishinde 19,5 myń adam (60%) bıznes-jobalardy qorǵady. Jobalaryn júzege asyrý úshin 8 myń adam shaǵyn nesıe aldy.Kýrsty támamdaǵan tyńdaýshylar 16 759 teń stıpendııa, óz jobasynyń bıznes-josparyn, kýrsqa qatysqany nemese ony aıaqtaǵany týraly sertıfıkat alady, sonymen qatar, 505000 teńge kóleminde grant, jyldyq mólsherlemesi 6% bolatyn 20 200000-ǵa deıin jeńildetilgen nesıe alýǵa múmkindigi bar»,- deıdi «Atameken» Kásipkerler palatasynyń dırektory Narıman Ábilshaıyqov.
2019 jyl Jastar jyly bolyp jarııalanǵandyqtan «Atameken», «Bastaý» aıasynda tek qana jastardy kásipkerlikke baýlýǵa arnalǵan «Jas kásipker» jobasyn júzege asyrady.
«Almatyda jeltoqsanǵa deıin «Jas kásipker» baǵdarlamasy boıynsha 2650 jasty, «Bastaý» boıynsha 6400 adamdy oqytýdy josparlaýdamyz», - dedi Almatydaǵy «Bastaý» jáne «Jas kásipker» jobalarynyń basshysy Qýanyshbek Ernııazov.
Aıta keterligi, Almaty qalasynyń Kásipkerler palatasy jumyssyzdardy eńbekpen qamtýǵa yqpal etýde, qazirgi kezde ońtústik astanada 8 mobıldi ortalyqtar jumys isteıdi, osylar arqyly bıznes-kýrstarǵa, «Eńbek» memlekettik baǵdarlamasynyń qysqa kýrstaryna jazylyp, jumys ornyn tańdaýǵa bolady. Jaqynda vokzaldar mańynan osyndaı taǵy 4 ortalyq ashylady.
