Almatylyqtardyń saqtandyrý jarnasy 63 mlrd teńgeden asty

ALMATY. QazAqparat – 2020 jyldyń 30 sáýirine deıin Medıtsınalyq saqtandyrý qoryna 319 mlrd teńgege jýyq qarjy jınaqtaldy. Bul týraly «Áleýmettik medıtsınalyq saqtandyrý qory» KEAQ Almaty qalalyq fılıaly málim etti, dep habarlaıdy QazAqparat tilishisi.

«Almaty qalasy respýblıka boıynsha jarnalar men aýdarymdardyń kólemi jaǵynan kósh bastap tur – jınaqtalǵan somanyń besten bir bóligi burynǵysha, ońtústik astananyń enshisinde. Jalpy, saqtandyrý júıesi iske qosylǵan 2017 jyldyń 1 shildesinen 2020 jyldyń 30 sáýirine deıingi aralyqta Almaty qalasynan Qorǵa 63 mlrd teńgeden astam jarna aýdaryldy. Onyń 56,7 mlrd teńgesi – jumys berýshilerdiń qaramaǵyndaǵy jumyskerler úshin jasaǵan aýdarymdary, qalǵan 6,6 mlrd teńge – jeke kásipkerler men azamattyq-quqyqtyq kelisimshart boıyntssha eńbek etetinderge tıesili», - dedi fılıal dırektorynyń orynbasary Janar Kenjebaeva.

Sondaı-aq, jyl basynan beri ózin-ózi jumyspen qamtyǵan 165 myńǵa jýyq adam 210 mln teńge kóleminde biryńǵaı jıyntyq tólem (BJT) tólegen.

Esterińizge sala ketsek, biryńǵaı jıyntyq tólem 2019 jyldyń 1 qańtarynan bastap engizilgen bolatyn. Jıyntyq tólemniń ishinde ózge áleýmettik tólemderge qosa saqtandyrý jarnasy da bar. Ol jalpy somanyń 40 paıyzyn quraıdy.

BJT – respýblıkalyq mańyzy bar qalalar úshin 1 aılyq eseptik kórsetkish (AEK) nemese 2651 teńge, aýyldyq jerler úshin – 0,5 AEK nemese 1326 teńge kóleminde belgilengen. Tólemniń bul túrin frılanserler, santehnıkter, qurylysshylar, taksı júrgizýshileri t.b. tóleı alady.