Almatylyqtardyń ótinishi aıaqsyz qalsa, birinshi basshy jaýapty bolady – Saǵyntaev

ALMATY. QazAqparat – Búgin Almatyda Baqytjan Saǵyntaevtyń qatysýymen qala aktıviniń otyrys ótti. Jıynda memlekettiń qoıǵan mindetin jedel júzege asyrý máselesi talqylandy, dep habarlaıdy QazAqparat tilshisi.

«Biz estıtin memleket tujyrymdamasy boıynsha mindetterdi júzege asyrýdy bastadyq. Barlyq basqarmalardyń basshylary men aýdan ákimderi áleýmettik jelilerde akkaýnt ashty. Bul akkaýnttar arqyly almatylyqtar bılikpen tikeleı baılanysa alady», - dedi B.Saǵyntaev.

Budan bólek aýdan ákimdikterinde jáne basqarmalarda halyqtyń suraýymen ashyq esik kúnderi ótkizilip turady.

«Adamdarǵa jaýap kerek. Olarǵa sebebin túsindirý kerek. Árbir túsken shaǵymdy, ótinishti nazardan tys qaldyrsa, jetekshiler tikeleı jaýap beretin bolady. Kadrlyq sheshimder de turǵyndarynyń pikirimen qabyldanatyn bolady», - dedi ákim.

Munyń aldynda da ákim Naýryzbaı aýdanynyń halqymen kezdesý kezinde kez-kelgen aktige halyqtyń maquldaýynsyz qol qoıylmaıtynyn aıtqan bolatyn.

«Eger jol, aryq jasalsa, turǵyndarmen kelisip baqylaý ornatý kerek. Kóshe turǵyndarynyń kóńili tolmasa, qabyldaý- tapsyrý aktisine qol qoıylmaıdy. Kisiler sapasy durys dese ǵana qol qoıamyz», - dedi ákim.