Almatylyqtardyń ómir súrý uzaqtyǵy 5,5 jylǵa uzardy
ALMATY. QazAqparat - Almatylyqtardyń ómir súrý uzaqtyǵy 5,5 jylǵa uzardy. Bul týraly Densaýlyq saqtaý basqarmasynyń basshysy Serikbol Mýsınov aıtty, dep habarlaıdy QazAqparat tilshisi.
Almaty medıtsınalyq qaýymdastyǵy Tuńǵysh Prezıdent kúnine oraı jıyn ótkizdi. Saltanatty jıynda qalalyq Densaýlyq saqtaý basqarmasynyń basshysy Serikbol Mýsınov qyzmetkerlerdi quttyqtap sóz sóıledi.
Basqarma basshysy atap ótkendeı, Qazaqstannyń densaýlyq saqtaý salasyndaǵy oń dınamıka Almatydaǵy ózgeristerden-aq kórinis beredi.
«Sońǵy 10 jylda bir turǵynnyń densaýlyǵyna bólinetin qarjy 3 ese, jylyna 17 081 teńgeden 55 000 teńgege artty. Sondaı-aq, jalpy halyq densaýlyǵyna jumsalatyn qarjy kólemi 19 mlrd teńgeden 99,5 mlrd teńgege ulǵaıdy. Qala turǵyndarynyń ortasha ómir súrý uzaqtyǵy 5,5 jylǵa 70,43 jastan 75,9 jasqa jetti», - dedi Serikbol Mýsınov.
Naýqastardy ambýlatorııalyq emdeýge bólinetin qarjy 4,3 ese ósti. Medıtsınalyq uıymdardyń materıaldy tehnıkalyq qamtylýyna - 27,5 mlrd teńge, kúrdeli jóndeý jumystaryna 9 mlrd teńge jumsaldy. Medıtsınalyq jumyskerlerdiń jalaqysy 1,4 ese artqan.
Basqarma basshysynyń sózine qaraǵanda, atqarylǵan jumystardyń nátıjesinde densaýlyq saqtaý salasynyń basty ındıkatorlary jaqsardy. Almatyda týý kórsetkishi 2011 jyldan beri ósip keledi. Halyq arasyndaǵy ólim kórsetkishi 1,5 ese azaıdy. Ana men bala ólimi 2-2,3 ese azaıdy.
Sonymen qatar, júrek qan tamyrlary aýrýynan kóz jumatyn turǵyndardyń sany 2 ese, qaterlik isikten - 2 ese, jaraqat alyp ýlanýdan 3 ese, týberkýlezden kóz jumatyndardyń sany 3,5 ese qysqardy.
