Almatylyqtardyń kommýnaldyq túbirtegine zańsyz engizilgen baǵandar anyqtaldy
ALMATY. QazAqparat - Almaty qalalyq Turǵyn úı jáne turǵyn úı ınspektsııasy qala turǵyndarynyń quqyǵyn qorǵaý jumystarynyń barysymen tanystyrdy, dep habarlaıdy QazAqparat tilshisi.
Basqarma basshysy Ánýar Óskenbaevtyń aıtýynsha, eń aldymen kommýnaldyq qyzmet túbirtegindegi artyq baǵan joıylǵan.
«Turǵyndardyń quqyǵyn qorǵaý sheńberinde kommýnaldyq qyzmetter boıynsha keletin túbirtekterdegi artyq baǵandar joıyldy. Kommýnaldyq túbirtekterdi basyp shyǵarýshy ALSEKO jáne Aqparattyq esepteý ortalyǵy kompanııalary oǵan - zańgerlik keńes berý jáne bos jumys oryndary týraly anyqtamalyq syndy qosymsha baǵan men shyǵyndardy qosyp kelgen. Kóptegen turǵyndar olardy baıqamastan osy ýaqytqa deıin tóledi. Al bul az soma emes. Bizdiń aralasýymyzdan keıin túbirtekterdegi qosymsha baǵandar alynyp tastaldy», - dedi ol.
Aıta ketý kerek, Almatyda 800-den asa PIK jumys istep keledi.
Byltyr olardyń 264-iniń jumysy tekserilip, 221 PIK basshysy ákimshilik jaýapkershilikke tartyldy.
