Almatylyqtardyń qaýipsizdigin 120 myń kamera baqylap otyr
ALMATY. QazAqparat - Almaty polıtsııasy qala turǵyndarynyń qaýipsizdigin baqylap otyratyn kameralardyń múmkindigi týraly aıtty, dep habarlaıdy QazAqparat tilshisi qalalyq PD silteme jasap.
Qoǵamdyq tártipti saqtap, jol qaýipsizdigin qamtamasyz etý jáne quqyqbuzýshylyqtyń aldyn alý úshin Almatyda 119 794 kamera jumys istep tur.
«Onyń 156-sy Jedel basqarý ortalyǵyna tikeleı aqparat berip otyrady. Ýnıversıada nysandarynda 1 173 beınekamera ornatylǵan. «Jol qozǵalysy qaýipsizdigi» avtomatty aqparattyq júıesinde 694 kamerasy bar 105 beket jasaqtalǵan. Metrodaǵy qaýipsizdikti qamtamasyz etý úshin 348 kamera ornatylǵan. Bul kameralar aqparatty anyǵyraq kórsetip, polıtsııa kabınetine jiberip otyrady. Bilim nysandarynda - 3 449, perzenthanalarda 143 kamera ornatylǵan. Aýlalarda 7 490 kamera turǵyndardyń qaýipsizdigin baqylap otyr. Qaladaǵy jekemenshik uıymdardyń aınalasynda 6 682 kamera ornatylǵan», - dedi qalalyq PD resmı ókili Saltanat Ázirbek.
Aıta ketý kerek, baqylaý kameralarynyń arqasynda 2018 jyly 1 543 qylmys ashyldy.
