Almatylyqtardyń áleýmettik máselelerin sheshetin ortalyq ashyldy

ALMATY. QazAqparat Almatylyqtardyń áleýmettik máselelerine arnalǵan «Open Almaty» atty qoǵamdyq qabyldaý orny jumysyn bastady, dep habarlaıdy QazAqparat tilshisi.

Qalalyq ákimdiktiń baspasóz qyzmetiniń habarlaýynsha, «Open Almaty»  Almaty ákimdiginiń turǵyndarǵa qyzmet kórsetý jónindegi jańa jobasy.

«Qoǵamdyq qabyldaýǵa kelgen árbir janǵa tıisti keńes beriledi jáne olar ákimdikke, qala basqarmalaryna, prokýratýraǵa, polıtsııaǵa, memlekettik kirister departamentine jáne basqalarǵa joldanǵan óz ótinishin jetkize alady», - delingen habarlamada.

Almaty ákimi Baýyrjan Baıbektiń aıtýynsha, jańa servıs memlekettik organdardyń jumysynyń tıimdiligin arttyryp qana qoımaı, turǵyndar aldynda memorgandardyń ashyq ekenin kórsetedi.

Jańa qalalyq servıs arqyly qalanyń árbir turǵyny nemese qonaǵy túrli qyzmetke qatysty óz usynysy men shaǵymyn qalanyń qoǵamdyq qabyldaýyna www.open-almaty.kz ınternet- portaly nemese 1308 nómiri boıynsha jibere alady.

«Open Almaty» portaly boıynsha túrli ómirlik jaǵdaılardy sheshý algorıtmimen qosa qalanyń  kommýnaldy qyzmet kórsetý oryndarynyń (jol, aryq, jylý júıesin, aýla jáne basqalaryn jóndeý) jumystarymen tanysyp, baılanysa alady.

Qoǵamdyq qabyldaý front-ofıste turǵyn úı, jumyspen qamtý jáne áleýmettik qyzmet, jolaýshylar kóligi, tabıǵı resýrstar men arhıtektýra basqarmalary, qalalyq prokýratýra, polıtsııa, memlekettik kirister departamenti, TJD, HQKO, Ulttyq kásipkerler palatasy ókilderi men medıatorlar qyzmet kórsetedi. Basqarmalar basshylary qoǵamdyq qabyldaýlar  ótkizip, túrli bastamalardy tanystyra alady.

Aıta  keterligi, 2015 jyldyń ózinde Almaty ákimdigi qalalyqtarǵa qolaıly bolý úshin Instagramda akkaýntyn ashqan edi. 2 jyl ishinde Instagramdaǵy turaqty aýdıtorııa 150 myń jazylýshyǵa jetti, qalalyqtardyń 20 myń ótinimi oryndaldy.

Jańa servıstiń jumys kestesi qala turǵyndarynyń jumys ýaqytyn eskere otyryp jasalǵan, qyzmet kórsetý ýaqyttary jaı kúnderi saǵat 8.00-den 20.00-ge deıin, senbi kúnderi saǵat 10.00-nan 17.00-ge deıin.

Ortalyqtyń meken jaıy: Baızaqov kóshesi, «Almaty Taýers» ortalyǵy.

2018 jyldan bastap, qala basqarmalary jáne kommýnaldyq qyzmet kórsetý kásiporyndary jóninde jobanyń 2-shi kezegi júzege asyrý josparlanǵan.