Almatylyqtardyń 81 paıyzy mindetti medıtsınalyq júıemen saqtandyrylǵan

ALMATY. QazAqparat – Almaty qalasy «Áleýmettik medıtsınalyq saqtandyrý qory» KEAQ fılıalynyń dırektory Tileýhan Ábildaev onlaın brıfıng barysynda megapolıstegi MÁMS júıesi boıynsha atqarylyp jatqan jumystar týraly baıandady, dep habarlaıdy QazAqparat tilshisi.

Onyń aıtýynsha, saqtandyrý júıesindegi ózekti máselelerdiń biri – jurtshylyqty saqtandyrý mártebesimen qamtamasyz etý.

Ulttyq ekonomıka mınıstrliginiń 1 aqpandaǵy málimetinshe, Almatydaǵy 1,9 mln turǵynnyń 81,5%-y saqtandyrylǵan.

Qalǵan 18,5%-y nemese 389 356 adam saqtandyrylmaǵan.

«Jergilikti atqarýshy organdarmen birlesip atqarǵan jumystar oń nátıjesin berip jatyr. Máselen ótken jyldyń 1 tamyzynda Almatyda saqtandyrylmaǵandardyń úlesi 22,6% bolsa, jyl sońynda 15%-ǵa deıin qysqarǵan. Alaıda búgingi tańda bul kórsetkish 18,5%-ǵa ósken. Qurylymdyq jaǵynan alyp qaraıtyn bolsaq, saqtandyrylmaǵan 389 myń adamnyń 142 909-y biryńǵaı jıyntyq tólemdi tóleýshi, 100 818-i jumysker. Keıbir sebeppen olardyń atyna jańa jarna aýdarý toqtap qalǵan.15 452-i jeke kásipker, 7 635 adam azamattyq quqyqtyq kelisimshart negizinde jumys isteýshi. 2 682 adam ózin-ózi jumyspen qamtamasyz etýshi», - dedi ol.

Sonymen qatar, ol jarna aýdarym kólemi MÁMS týraly zańda kórsetilgen tártip boıynsha ózgerip otyratynyn jetkizdi.

«Zań boıynsha jumys berýshiler árbir qyzmetker úshi óz qaltasynan aýdarym jasaıdy.Jumys berýshi tóleıtin aýdarym mólsheri bıyl ózgergen joq, qyzmetker tabysynyń 2% kólemin aýdarady. Ol 2017 jyldyń 1 shildesinen – 1%, 2018 jyly – 1,5%, 2020 jyly – 2% deńgeıinde boldy», - dedi Tileýhan Ábildaev.

Sondaı-aq ol jumys berýshi aýdarymǵa qosa, jaldamaly jumyskerlerdiń jalaqysynan 2% mólsherinde jarna ustap Qorǵa aýdaratynyn aıtty.

Biraq aı saıyn jarna ustalatyn tabys kólemi 10 eń tómengi jalaqydan aspaýy tıis. ıAǵnı aı saıynǵy jarna mólsheri 8500 teńgeden joǵary bolmaýy kerek.

Jeke kásipkerlerdiń jarnasy ózgergen joq. Olar burynǵysha 1,4 eń tómengi jalaqynyń 5%, ıaǵnı 2975 teńge tóleıdi.