Almatylyqtardyń 42%-y keneden qorqady - saýalnama
ALMATY. QazAqparat - Almatyda entsefalıt kenesi shaǵatyn maýsym bastaldy.
Osyǵan baılanysty saqtandyrý kompanııasynyń sarapshylary turǵyndar arasynda saýalnama júrgizgen.
1500 adamnyń 42%-y keneden qorqady eken, 26%-y kene maýsymyn elemeı tabıǵatqa shyǵa beredi. Respondentterdiń 11,2%-y tabıǵatqa múlde shyqpaıtyndyqtan, basyn aýyrtpaıdy. 6,4%-yn buryn kene shaqqan. Suralǵandardyń tek 5,1%-y ǵana ekpe alady, 2,1%-y túrli jaqpamaılardy qoldanady.
Al turǵyndardyń aqparattandyrylý kórsetkishine kelsek, respondentterdiń 21%-y kene maýsymyn dál anyqtaǵan.
Mamandardyń aıtýynsha, jándikterdiń erekshe belsendiligi maýsym aıynyń birinshi jartysyna keledi.
Kóbinese túski 12-den 2-ge deıingi aralyqta adam tánine jabysqysh keledi. Keneler 5 jylǵa deıin azyqsyz ómir súre alady eken.
Respondentterdiń 8,6%-y ǵana qydyryp baratyn aımaǵynda zararsyzdandyrý júrgizilgenin aldyn ala anyqtaıtyny belgili boldy.
Bıyl Almatyda aýmaǵy 2354,17 ga bolatyn taýly ormandar men qala ishindegi saıabaqtar men skverlerde zararsyzdandyrý sharalary júrgizildi.
Al jalpy respýblıka boıynsha 8340, 34 ga aımaqqa arnaıy hımııalyq qosyndylar sebiledi.
Jylda Qazaqstanda 8-11 myń adam kene shaqqanyn aıtyp dárigerge júginedi. Olardyń 30%-y balalar.
