Almatylyqtardyń 39 paıyzy koronavırýsty qoǵamdyq oryndarda juqtyrǵan
Almaty ákimdigi qalanyń koronavırýs boıynsha «qyzyl» aımaqqa kirýine baılanysty megapolıstegi epıdemııalyq jaǵdaıdy eskere otyryp, qala turǵyndary men qonaqtaryn koronavırýs ınfektsııanyń aldyn alý sharalaryn kúsheıtýge - betperde rejımin, áleýmettik qashyqtyqty saqtaýǵa, múmkindiginshe qoǵamdyq oryndarǵa, ásirese nashar jeldetiletin jabyq oryndarǵa (ǵımarattarǵa) barýdan bas tartýǵa shaqyrady.
Pandemııa bastalǵaly beri Almatyda COVID-19-dyń 21 276 oqıǵasy tirkeldi. 100 myń turǵynǵa shaqqanda juqtyrý kórsetkishi-1065,6.
Qańtar aıynyń sońǵy 3 aptasynda indet juqtyrǵandardyń jas erekshelikteri mynandaı:
20-39 jas aralyǵynda -35,4% , 40-59 jas aralyǵynda- 27,4%, 60 jas jáne odan joǵary -21,5%;
Ctatıstıkalyq derekterge sáıkes, adamdar indetti kóbinese qoǵamdyq oryndarda (39,6%) , úı jaǵdaıynda (27,5%), qoǵamdyq kólikte (20,3% ) juqtyrǵan.
COVID-19 - ben statsıonarlyq emdeýde 909 adam jatyr: 745-iniń jaǵdaıy ortasha aýyr, 149-y aýyr jaǵdaıda, 15-i óte aýyr jaǵdaıda. KVI belgileri bar 596 naýqas úıde baqylaýǵa alynǵan.
Aıta keteıik, Almatyda barlyǵy 7011 tósek-oryn daıyndalǵan, onyń ishinde KVI-men aýyratyn naýqastar úshin-1866.
Almatyda sanıtarlyq-epıdemııalyq sharalardyń saqtalýyn baqylaý aıasynda 32 monıtorıngilik top jumysyn jalǵastyrýda. Qańtar aıynyń basynan karantındik sharalardyń saqtalýyn tekserý boıynsha 305 is-shara ótkizildi, 2305 nysan qamtyldy, 153 nysanda buzýshylyqtar anyqtaldy. Buzýshylyq faktileri boıynsha tıisti materıaldar berilýde.
Sonymen qatar, 2021 jylǵy 17-24 qańtar aralyǵynda bir apta ishinde 101 reıd júrgizildi, 775 nysan qamtyldy, karantındik sharalar buzylǵan 77 nysan anyqtaldy. Sondaı-aq, ótken aptada barlyq aýdandardyń HQKO-ry men mamandandyrylǵan HQKO-ry, qoǵamdyq kólik, áýejaı jáne basqa da qoǵamdyq oryndar tekserildi.
Kásipkerlik sýbektileri pandemııa kezeńinde qaýipsizdik sharalarynyń talaptaryn múltiksiz saqtaýy qajet — bul qyzmetkerler men kelýshilerdiń termometrııasy, áleýmettik qashyqtyq pen betperde rejımin saqtaýdy, jeke qorǵanys quraldarynyń (betperdeler, qolǵaptar) aýystyrylýyn, sanıtaızerlerdiń jáne dezınfektsııalaý quraldarynyń qorynyń bolýyn, úı-jaılardyń jeldetilýin qamtamasyz etý.
Joǵaryda atalǵan talaptardyń buzylýy uıym qyzmetkerleri arasynda syrqattanýshylyqqa jáne kásiporyndardyń jumysyn toqtatýǵa ákep soǵady.