Almatylyqtardy mezi etken temirjol tuıyǵynda dybys oqshaýlaý jumystary júrgiziledi

ALMATY. QazAqparat – Almaty ákimi Erbolat Dosaev Jetisý aýdanyndaǵy temirjol tuıyqtarynyń birinde dybys oqshaýlaý jumystary júrgiziletinin málimdedi, dep habarlaıdy QazAqparat tilshisi.

«Men Pavlodar kóshesinen keldim. Onda jyldar boıy jóndeý kórmegen temirjol tuıyǵy bar. Ár tún saıyn ol tuıyqqa 5-6 vagonnan ákelinedi. Onyń daýysynan balalar oıanady, túnde uıyqtaý múmkin emes», - dedi ákimmen kezdesýde kópshilik atynan másele kótergen aýdan turǵyny.

Qala ákimi bul másele osy kóktemde sheshiletinin jetkizdi.

«Kún jylynǵan soń barlyq jeke kásip ıelerin atalǵan meken-jaıǵa jınaýdy josparlap otyrmyz. Olarǵa óz qarajaty esebinen temirjoldyń osy ýchaskesin jóndeýdi jáne dybys oqshaýlaýdy qamtamasyz etýdi tapsyramyz. Bul máseleni olardyń naýryz-sáýir aılarynda sheshýin ózim tikeleı baqylaımyn», - dedi Erbolat Dosaev.

Buǵan deıin habarlaǵanymyzdaı, ákim Jetisý aýdanynda naýryz aıynda jańa saıabaqtyń qurylysy bastalatynyn málim etti. Naqtyraq aıtqanda, demalys orny «Kemel» shaǵyn aýdanynda salynady.