Almatylyqtardy MÁMS júıesimen qamtý máseleleri boıynsha shtab otyrysy ótti
Otyrysqa medıtsınalyq uıymdardyń basshylary men joǵary oqý oryndarynyń rektorlary qatysty.
Almatyda elimizdegi bıznes sýbektileriniń basym bóligi – 116 myńnan astamy tirkelgen jáne jumys isteıdi. Búginde ShOB qyzmetkerleriniń 88,8%-y MÁMS júıesindegi derekterin ózektendirdi. Málimetter bazasynda kásipkerlik sýbektilerin naqtylaý boıynsha jumys 2021 jyldyń úshinshi toqsanynyń sońyna deıin jalǵasady.
Joǵary oqý oryndary men kolledjderdiń 15 jeńildik sanatyna enetini stýdentterin mindetti áleýmettik medıtsınalyq saqtandyrýmen qamtý máselesine erekshe nazar aýdaryldy ári olardyń jarnalaryn memleket tóleıdi.
Medıtsınalyq saqtandyrý qory Almaty fılıalynyń dırektory Tileýhan Ábildaevtyń aıtýynsha, jeńildik sanatyna orta, tehnıkalyq jáne kásiptik, orta bilimnen keıingi, joǵary bilim berý uıymdarynda, sondaı-aq joǵary oqý ornynan keıingi bilim berý uıymdarynda kúndizgi bólimde oqıtyndar úmitker bola alady.
«Qor jeńildik sanattarynyń tizimin jasamaıtynyn túsingen jón. 15 jeńildik sanatyndaǵy ókilderdiń tizimin qorǵa ýákiletti organdar aqparattyq júıeler arqyly jiberedi. Sodan keıin olar jeńildik berý kezeńinde avtomatty túrde saqtandyrylady»,– dedi Tileýhan Ábildaev.
Bolashaqta medıtsınalyq kómek alý kezinde problemalarǵa tap bolmaý úshin stýdentter MÁMS júıesindegi mártebesin Qoldau 24/7 qosymshasy, Saqtandyry jedelhat boty jáne fms.kz saıty arqyly tekserýleri tıis.
Saqtandyrý mártebesi bolmaǵan jaǵdaıda, stýdentter UBBB (Ulttyq bilim berý bazasy) aqparattyq júıesine málimetterdi engizý úshin ózderiniń oqý oryndaryna júginýleri kerek. Sodan soń olar kúndizgi oqýdyń barlyq kezeńinde saqtandyrylady. Eger stýdentter saqtandyrylmaǵan ári shuǵyl medıtsınalyq qyzmetke muqtaj bolsa, onda olar oqıtyn jerinen anyqtamany qosa otyryp, 24/7 qoldau qosymshasy arqyly ótinish jiberýi kerek. Mundaı jaǵdaılarda qor ýaqytsha saqtandyrý mártebesin bir aıǵa saqtandyra alady.
Keńeste qalalyq qoǵamdyq densaýlyq, bilim, áleýmettik damý, kásipkerlik jáne ınvestıtsııalar basqarmalarynyń jáne aýdandar ákimdikteriniń basshylary tyńdaldy. Kezdesýge qatysýshylar atalǵan stýdentterdiń ulttyq deńgeıdegi ıntegratsııasy jáne olardyń MÁMS málimetter bazasyndaǵy mártebesi týraly usynystaryn aıtty.
Kezdesýdi qorytyndylaı kele, MÁMS máseleleri jónindegi aımaqtyq shtabtyń tóraǵasy, Almaty qalasy ákiminiń orynbasary Erjan Babaqumarov álemde bolyp jatqan pandemııa men jańa mýtatsııalanǵan shtamdardyń aınalymy aıasynda halyqty MÁMS júıesimen qamtý densaýlyq saqtaý júıesiniń strategııalyq mańyzdy faktory ekenin atap ótti.
Sondyqtan aýdan ákimdikterine qosymsha sharalar qabyldaý úshin birqatar naqty tapsyrmalar berildi. Qoǵamdyq densaýlyq saqtaý basqarmasy turǵyndarmen, ásirese AMSK pýnktterinde azamattardy emhanalarǵa taǵaıyndaý boıynsha túsindirý jumystaryn kúsheıtýi kerek.
Medıtsınalyq saqtandyrý qorynyń tóraǵasy Bolat Tókejanov atap ótkendeı, búkil el boıynsha aımaqtyq shtabtar aýqymdy jumystardy atqaryp jatyr.
«Halyqty mindetti medıtsınalyq saqtandyrý júıesimen qamtý jumystary jalǵasýda. 2021 jyldyń 1 sáýirindegi jaǵdaı boıynsha el turǵyndarynyń 84,4%-y saqtandyrylǵan. Biraq 2,9 mln adam mindetti áleýmettik medıtsınalyq saqtandyrý júıesinen tys qalýda. Olardyń barlyǵynyń medıtsınalyq qyzmetterge qoljetkizýleri óte mańyzdy»,– dep atap ótti Bolat Tókejanov.
