Almatylyqtardy botanıkalyq baqtyń taǵdyry alańdatady
ALMATY. QazAqparat - Almatydaǵy botanıkalyq baq qaıta jóndeýden keıin qandaı keıipke enbek? Onyń aýmaǵy avtoturaqqa aınala ma, jylyjaıdyń jaǵdaıy ne bolmaq? Ákimdik qaramaǵyna ótkiziletin erekshe qorǵalǵan aımaqtyń aldaǵy jaı-kúıi qoǵamdyq keńeste talqylandy, dep habarlaıdy QazAqparat tilshisi.
Botanıkalyq baqty jóndeýden ótkizýdiń kontseptsııasynda sýarýdyń jańa júıesi, baqty qorshaý men kiretin esikti anyqtaý, ony jaryqtandyrý men beınebaqylaý qoıý máselesi, ekskýrsııalyq ınfraqurylym salý qarastyrylǵan. Botanıkalyq baqty jańartýǵa Bolat Ótemuratov qory men «Vernyı kapıtal» kompanııasy ókilderi yqylas bildirip otyr. Qurylysty 2019 jyldyń sońyna deıin júzege asyrý josparlanǵan.
Áıtse de, qala turǵyndaryn botanıkalyq baqtyń qaıta jańǵyrýdan keıingi taǵdyry alańdatady. Erekshe demalys ornynda qoǵamdyq tamaqtaný oryndary qaptap, aınalasy avtoturaqqa aınalyp, ol kóp saıabaqtyń birine aınalmaı ma degen kúdik bar.
Qalalyq tabıǵı resýrstar jáne tabıǵatty paıdalanýdy retteý basqarmasy basshysy Áset Masabaev pen «Vernyı kapıtal» kompanııasynyń dırektory Erlan Ospanov máseleniń túıinin tarqatyp, turǵyndardyń kúdigin seıiltýge tyrysty.
«Botanıkalyq baqtyń statýsy ózgermeıdi. Baqqa kelýshilerdi ákelip tastaý úshin nemese alyp ketý úshin tehnıkalyq esik jasalady. Kiretin joldar Ál-Farabı men Tımırıazev kósheleri tusynan jasalýy múmkin. Biraq bul jer avtoturaqqa aınalmaıdy», - dedi Áset Masabaev.
Erlan Ospanovtyń aıtýynsha, baq terrıtorııasynda qoǵamdyq tamaqtaný oryndaryn ashý josparda joq.
«Sýsyndar tek kireberistegi pavılondarda satylatyn bolady. Baq terrıtorııasynda mundaıǵa úzildi-kesildi tyıym salynǵan», - dedi ol.
Sondaı-aq, Áset Masabaev ákimdik qaramaǵyna tek baqty paıdalaný qyzmeti beriletinin, ǵylymı bóligi QR BǴM menshiginde qalatynyn atap ótti.
Aýmaǵy 103,6 gektardy alyp jatqan baqtyń 27 gektaryna jóndeý jumystary júrgiziledi. Ókinishke oraı, jylyjaıdy qalypqa keltirý jóndeý jobasyna kirmeıtini aıtyldy.
QR BǴM tıesili botanıkalyq baqtyń qoǵamdyq aımaǵyn ákimdikke ótkizý máselesi jyl sońyna deıin sheshilmek. Sondaı-aq, Bolat Ótemuratovtyń qory baqtyń rekonstrýktsııasyna bólingen 15 mln dollardyń ınvestıtsııa emes ekendigin alǵa tartady. Bul áleýmettik joba qarajaty retinde qarastyrylǵan.
