Almatylyqtardy 30 mln teńgege aldaǵan alaıaq qamaýǵa alyndy
Almaly aýdanynyń polıtsııa qyzmetkerleri 39 jastaǵy azamat P.-ǵa qatysty QR QK-niń 190-baby 3-bóligi boıynsha qylmystyq is qozǵady.
«Er adam Almatynyń birneshe turǵynyn aldady degen kúdikke ilindi. Onyń áreketinen keltirilgen jalpy materıaldyq shyǵyn shamamen 30 mıllıon teńge. Aldanǵan azamattar kúdiktiniń zańsyz áreketterin óz aryzdarynda kórsetken. Aryzdanýshylardyń biriniń sózine sáıkes, ol azamat P.-men ınternette tanysqan. Jańa tanysy BAÁ nemese Eýropadan naryqtan tómen baǵaǵa kólik alýǵa kómektesýdi usynǵan. Kúdiktige 30 myń dollar kóleminde aqsha aýdarylǵannan keıin ol baılanysqa shyǵýyn toqtatqan», – dedi Almaly aýdandyq Polıtsııa basqarmasynyń bastyǵy Esen Ysqaqov.
Kúdikti qamaýǵa alyndy. Onyń osyǵan uqsas birneshe iske qatysy bar ekeni anyqtaldy – ol kepilge qoıylǵan páterlerdi satyp alýǵa múmkindik beremin degen jeleýmen jergilikti turǵyndardyń aqshasyn jymqyrǵan. Al ózin ekinshi deńgeıli bankterdiń biriniń taratý komıssııasynyń múshesi retinde tanystyrǵan.
«Taǵy bir epızodta azamat P. qylmystyq isti toqtatýǵa kómektesýge ýáde bergen. Kúdiktige qatysty sotqa deıingi tergeý aıaqtalǵanǵa deıin qamaýǵa alý túrindegi bultartpaý sharasy tańdaldy.
Osy adamnyń alaıaqtyq áreketinen zardap shekken azamattar myna telefon nómirleri arqyly habarlasýlaryna bolady: 8-708-707-9202; 8-705-555-7763; 8-775-719-2727», - dedi polıtsııadan.