Almatylyqtardy 15 mln teńgege aldaǵan alaıaq qamaýǵa alyndy
Alataý aýdanynyń polıtsııa qyzmetkerleri 30 jastaǵy azamat E.-ge qatysty QR QK-niń 190-baby 3-bóligi boıynsha qylmystyq is qozǵady.
«Er adam Almatynyń birneshe turǵynyn aldady degen kúdikke ilindi. Onyń áreketinen keltirilgen jalpy materıaldyq shyǵyn shamamen 15 mıllıon teńge. Kúdikti ózin dóńgelekter men dıskterdi tek kóterme jetkizýshi retinde tanystyrǵan. Alam deýshilerge tikeleı qoımadan arzan baǵadaǵy taýardy alyp berýge ýáde berip, taýar tólemin aldyn alyp otyrǵan. Ol taýardyń kólemine qaraı 500 myńnan 6 mıllıon teńgege deıin alǵan. Búgingi kúni onyń ústinen 12 azamattan polıtsııaǵa aryz tústi», – dedi Alataý aýdandyq polıtsııa basqarmasynyń bastyǵy Іlııas Ómirserikov.
Kúdikti ýaqytsha ustaý ızolıatoryna qamaldy.
Polıtsııa ókili, E. esimdi azamattyń qylmystyq áreketterinen zardap shekken adamdardan myna telefondar arqyly habarlasýlaryn suraıdy: 8-700-300-99-96; 8-778-626-11-08.