Almatylyqtardy 120 mıllıon teńgege aldap soqqan adam sottaldy
ALMATY. QazAqparat - Almatyda turǵyndardy 120 mıllıon teńgege aldap soqqan adam sottaldy, dep habarlaıdy QazAqparat tilshisi.
Er adam almatylyqtarǵa Qytaıdan arnaıy tehnıkany satyp alyp, jetkizemin dep ýáde etken.
«Qylmystyq is-materıaldary boıynsha ol asa iri kólemde alaıaqtyq jasaýmen aınalysqan. Ol úshin úlken jospar qurǵan. Almaty qalasynda arnaıy kompanııa tirkep, keńse jaldap, «tıimdi» sharttarmen arnaıy tehnıkany satý týraly jarnama ornalastyrǵan. Sondaı-aq, qylmysker bir rettik syıaqy tólep, fırmany saýatsyz adamǵa tirkegen. Osylaısha iri gabarıtti tehnıkany satyp alǵysy kelgen eki azamatty aldaǵan. Birinshi jaǵdaıda satyp alýshy 80 mıllıon teńge tólese, ekinshisinde 40 mıllıon tólegen. Alaıda, ýáde etilgen taýarlardy olar áli almady», - dedi Almaty qalasy PD Tergeý basqarmasy bastyǵynyń mindetin atqarýshy Erǵalı Ibraımov.
Jábirlenýshiler polıtsııaǵa júgingennen keıin kúdikti birden ustaldy. Qylmystyq is QR QK-niń 190-baby 4-bólimi boıynsha tergeldi. Kúdikti qamaýǵa alyndy. Onyń kinási dáleldendi.Joǵaryda aıtylǵan aýyr sanattaǵy zańsyz áreketterdi jasaǵany úshin S.azamat 6 jyl 8 aıǵa bas bostandyǵynan aıyryldy. Úkim zańdy kúshine endi.
