Almatylyqtar jylýǵa qatysty shaǵymdanyp jatyr: Úıden góri dala jyly
ALMATY. QazAqparat - Almatylyqtar áleýmettik jeli arqyly úılerinde jylýdyń joq ekenine shaǵymdandy, dep habarlaıdy QazAqparat tilshisi.
«Nazarbaev 189/2-de áli jylý joq. 10 kún boldy, áli tońyp júrmiz. Balalar men biz, eresekter de tondyq. Bul máseleni PIK-ke silteıdi. PIK bolsa, jóndeýge silteıdi. Osynyń bárine jazda daıyndalsa bolmas pa edi?! Ákimdik, sizder jaqyn jerdesizder ǵoı. Kelip, kóz jetkizińizder! Kórshi podezde 90 jastaǵy apa tońýda. Jeksenbide jylý beremiz dep ýáde bergen, biraq, áli jylý joq»,- dep shaǵymdandy Almaty turǵyny.
Atalǵan másele boıynsha «Almaty jylý júıesi» JShS-da osy mekenjaı boıynsha balanstyq shekteý shekarasyndaǵy parametrler berilgen dep jaýap berdi.
«Qazirgi ýaqytta úıdiń ózinde jylytý júıesi óship tur. PIK tehnıkalyq jertólede memlekettik baǵdarlama boıynsha jylý júıesin ishinara aýystyrýda», - dep málimdedi «Almaty Jylý júıesi» energetıkalyq kompanııasynan.
Qalanyń Baıtursynov, 191 úıde turatyn taǵy bir turǵyny úıde jylý jáne ystyq sýmen qamtý boıynsha másele bar ekenin aıtty.
«Kesheden beri ystyq sýdyń ornyna sýyq sý aǵýda. Batareıalar sál ǵana jyly»,- dep Facebook-taǵy topqa jazdy .
Jeliniń basqa paıdalanýshysy — Gagarın, 280a turǵyny úıiniń áli jylý júıesine qosylmaǵanyn jazdy.
«Úıde óte sýyq. Páterden góri, dala jyly. Biz ákimdikke de qońyraý shalǵan edik, olar bizge Bostandyq aýdanynyń jylytý boıynsha bas mamany Erlan Seıdýllaevtyń telefon nomerin berdi. Men oǵan keshe habarlasqanda, jylý keshke beriledi degen, biraq, áli eshqandaı ózgeris joq. Batareıalar qalaı sýyq boldy, áli solaı. Bul másele bizde jyl saıyn qaıtalanady. Bizdi tek 20 qazannan keıin jylýǵa qosady, onyń ózinde de tolyq qospaıdy»,- dep shaǵymdandy almatylyq turǵyn.
Atalǵan shaǵymdar boıynsha «Almaty Jylý júıesi» mamandary jumys júrgizilip jatqanyn habarlady.
Sondaı-aq, jaqynda Pedıatrııa men balalar hırýrgııasynyń ǵylymı ortalyǵynda jylýdyń joqtyǵy týraly shaǵym jazylǵan edi: «Aýyr naýqas balalar sýyq palatalarda tońýda. Balalardyń densaýlyǵyna kim jaýap beredi? Nege kishkentaı naýqas balalar jylýsyz qaldy?»,- dep suraq qoıdy Facebook paıdalanýshysy.
«Almaty Jylý júıesi» sol kezde ǵylymı ortalyqqa jylý 2 qazanda berildi dep jaýap bergen bolatyn.
«Jylý tasymaldaǵashtyń ýaqytsha bolmaýy jaqyn mańdaǵy obektilerdi belsendi qosýmen baılanysty boldy. Bul jelilerdegi qysymnyń tómendeýine áser etti. «Almaty jylý júıesi» JShS qyzmetkerleri ǵylymı ortalyqtaǵy jelilerdiń jumysyn qalpyna keltirý boıynsha jumystar júrgizdi.
Aǵymdaǵy jylytý maýsymy aýa raıy jaǵdaıyn esepteýmen bekitilgen temperatýralyq kestege sáıkes júrgiziledi. Ádette, ortalyqtandyrylǵan jylýmen jabdyqtaýdy tolyq qalypqa keltirý úshin jylytý maýsymy ashylǵan soń, shamamen bir apta qajet.
Bul jylý energııasy júıeleriniń tehnologııalyq erekshelikterine baılanysty», - dep jaýap berdi kompanııadan.
Sondaı-aq, jaqynda Almatydaǵy birqatar úıler magıstraldyq qubyr apatyna baılanysty jylýsyz qalǵany habarlanǵan edi.
