Almatylyqtar Jeńis kúnin sán-saltanatymen toılap jatyr

ALMATY. QazAqparat – Almatyda Jeńis kúni merekesi sán-saltanatymen toılanyp jatyr, dep habarlaıdy QazAqparat tilshisi.

Mereke tańǵy saǵat 9.30-da 28 gvardııashyl-panfılovshylar atyndaǵy saıabaqta Máńgilik alaýǵa gúl shoqtaryn qoıýdan bastaldy. Osy saıabaqta qazaqstandyq zamanaýı áskerı tehnıka men qarý-jaraqtyń kórmesi ótip jatyr. Budan bólek, Ekinshi dúnıejúzilik soǵys ardagerleri men tyl eńbekkerlerine áskerı-dalalyq as mázirimen merekelik túski as berilip, kontsert uıymdastyryldy.

Sondaı-aq qala turǵyndary «Batyrlarǵa taǵzym» aktsııasy aıasynda Ortalyq mádenıet jáne demalys saıabaǵynan 28 gvardııashyl-panfılovshylar atyndaǵy saıabaqqa deıin maıdanger ata-ájeleriniń sýretterin ustap júrip ótti.

Aıta keteıik, Almatyda merekelik is-sharalar qalanyń basqa aýdandarynda da ótip jatyr.

Búgin qazaqstandyqtardy Jeńis kúni merekesimen Memleket basshysy Qasym-Jomart Toqaev pen QR Tuńǵysh Prezıdenti Nursultan Nazarbaev quttyqtady.

Memleket basshysy elordada «Otan ana» monýmentine gúl shoqtaryn qoıý rásimine qatysty.