Almatylyqtar jappaı qan tapsyryp jatyr
ALMATY. QazAqparat – Almatylyqtar qan tapsyrý ortalyǵyna aǵylyp jatyr, dep habarlaıdy QazAqparat tilshisi.
Álmerek aýylynda bolǵan ushaq apatynan soń áleýmettik jelide qan donory qajet ekeni týraly aqparat taraǵan bolatyn. Bul aqparatty Instagram jelisinde QR Bala quqyqtary jónindegi ýákil Arýjan Saın jáne Almaty qalasynyń ákimdigi jarııalaǵan edi.
Sonymen qatar, belgili ánshi Meırambek Bespaev ta kópshilikti qan tapsyrýǵa shaqyrdy.
Áleýmettik jelidegi habarlamadan soń qala turǵyndary qan ortalyǵyna qaraı aǵyldy. Birer saǵattan soń qaladaǵy qan ortalyǵyna jınalǵan adam qarasy kóbeıip ketti. Donor bolýǵa nıet bildirgenderdiń sany saǵat sanap artyp jatyr.
Aıta keteıik, búgin tańda Almatydan Nur-Sultan qalasyna ushyp shyqqan ushaq radardan joǵalyp ketti.
Keıin 95 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.
Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty.
QR Prezıdenti Qasym-Jomart Toqaev ushaq apatyna kináliler zańǵa sáıkes qatań jazalanatynyn málimdedi. Elbasy Nursultan Nazarbaev jolaýshylar ushaǵynyń apatqa ushyraýyna baılanysty kóńil aıtty.
QR DSM ushaq apatynan zardap shekkenderge medıtsınalyq kómek kórsetý úshin resýrstar jetkilikti ekenin, qan tapsyrýdyń qajeti joq ekenin málimdedi.
