Almatylyqtar jappaı elektrosamokatqa kóshe bastady
ALMATY. QazAqparat - Almaty turǵyndary arasynda elektrosamokat pen elektrovelosıpedke degen suranys kúrt artty, dep habarlaıdy QazAqparat tilshisi.
Jeńil kólikterdiń satylymy byltyrǵymen salystyrǵanda 70 paıyzǵa artqan.
Qala bıligi bul qubylysty qaladaǵy velojoldardyń, velosıped dáliziniń jaqsarýymen baılanystyryp otyr.
Bıyl velodáliz 30 shaqyrymǵa ulǵaıǵan.
Aıta ketý kerek, 2018 jyly Nazarbaev, Abaı, Abylaı han, Respýblıka saraıy, Jeltoqsan, Gogol kóshelerindegi jaıaý júrginshi joldary qaıta jasalǵan bolatyn. Bul jobaǵa 578 mln teńge bólindi.
Qazir eki dóńgelekti kólikke minip alǵan úlkendi de, jasty da jıi keziktiremiz.
«Men avtokólikpen 42 jyl júrgenmin. Qazir jasym 74-te, kózim durys kórmeıdi. Balalarym elektrosamokat syılady. Osynyń arqasynda qalanyń ortalyǵyndaǵy kez kelgen núktege bara alamyn. Asa kóp qarjyny talap etpeıdi», - dedi zeınetker Vladımır Ivanov.
Eń qymbat samokattarda elektr qýaty 800 Vt jetedi, jyldamdyǵy da joǵary.
Elektrosamokat saǵatyna 30 shaqyrymǵa deıin júre alady.
Bul modelde akkýmýlıator rýlde ornalasqan. Sol sebepti, kólshikterden ótkende batareıaǵa sý tımeıdi. Qajet bolsa, ekinshi akkýmýlıator ornatýǵa da múmkindik bar.
Sonymen qatar, arnaıy qosymsha ornatý arqyly samokattyń qýat kúshin, jyldamdyǵyn baqylap otyrýǵa bolady.
Aıta ketý kerek, eletkrosamokatpen júrý úshin júrgizýshi kýáligi qajet emes. Eń bastysy jol erejesin saqtaý kerek. Atap aıtqanda, elektrosamokat tizgindegen jolaýshylar velojoldarmen nemese joldyń oń jaq shetinde ǵana júrýge ruqsat berilgen.
«Jeńil kólikterdiń» quny 70 myńnan 250 myń teńgege deıin.
Almaty turǵyny Erlan Alımhanov elektrovelosıped-transformer oılap tapty.
«Innovatsııalyq tehnıka birneshe ese jınalyp, búktele alady. Elektrobaık-transformer úshin arnaıy turaq qajet emes, ári úıdegi toqpen qýattalady», - dedi Erlan Alımhanov.
