Almatylyqtar jańa kólikterin onlaın rásimdeı bastady
ALMATY. QazAqparat – Almatyda jańa kólikterdi onlaın tirkeý qyzmeti iske qosyldy, dep habarlaıdy QazAqparat tilshisi.
Kóligin onlaın rásimdegen almatylyq Baqyt Beısenáli búgin qaladaǵy №2 mamandandyrylǵan HQO-dan daıyn bolǵan qujattaryn aldy.
«Kóligimdi onlaın tirkeý qıyndyq týdyrar dep oılaǵam. Aıtarlyqtaı qıyn bolmady. Jeke kabınetime kelgen avtosalon jibergen ótinimmen tanysyp, jańa kóligime nómir tańdadym. Banktik kartochkamen memlekettik baj salyǵyn jáne tirkeý alymyn tólep, ótinimdi rastadym. Bar bolǵany osy. Daıyn degen habarlamany alǵan soń, nómirlik belgini alýǵa keldim. Bas aıaǵy bir saǵatta jumysym bitti. Ortalyqtaǵy mamandarǵa da rahmet, barlyq qyzmetti joǵary deńgeıde kórsetti», - deıdi Almaty qalasynyń turǵyny Baqyt Shabanuly.
Jańa kólik ıesi atanǵan taǵy bir azamat Nuraly Ahmetbaev ta onlaın rásimdeýdiń qolaıly ekenin aıtyp, zamandastaryn úıden shyqpaı qyzmet alýǵa shaqyrdy.
Aıta keteıik, bul qyzmet túri osy aptanyń basynda iske qosyldy. QR Tsıfrlyq damý, ınnovatsııalar jáne aeroǵarysh ónerkásibi mınıstrligi, QR Іshki ister mınıstrligi, «Azamattarǵa arnalǵan úkimet» MK KE AQ jáne «Ulttyq aqparattyq tehnologııalar» AQ birlesip iske asyrǵan servıste, ázirshe Qazaqstan aýmaǵynda jasalǵan, sondaı-aq Eýrazııalyq ekonomıkalyq odaqqa kirmeıtin elderden ákelingen avtomobılderdi onlaın tirkeýge bolady.
«Jańa kólikti onlaın qalaı tirkeımiz», - dep telefon soǵyp suraýshylar kóp edi. Endi ol da sheshimin tapty», - deıdi «Azamattarǵa arnalǵan úkimet» MK Almaty qalasy fılıalynyń PR-menedjeri Jańyl Ápetova.
Onyń aıtýynsha, endi avtokólik satyp alý jóninde kelisim jasalǵannan keıin avtosalon ókili VIN-kodty, sondaı-aq klıenttiń JSN-y kórsetilgen qajetti qujattaryn bekitip, eGov portaly arqyly avtokólik quralyn tirkeýge ótinim beredi. Bul ótinim satyp alýshynyń jeke kabınetine kelip túsedi. Satyp alýshy eGov portalyndaǵy jeke kabınetine kirip, ótinimmen tanysady. Avtomobılge arnalǵan memlekettik nómirlik belgini tańdaı otyryp, memlekettik baj salyǵyn jáne tirkeý alymyn tóleıdi jáne óziniń elektrondyq tsıfrlyq qoltańbasymen (ETsQ) qol qoıyp, ótinimdi rastaıdy. Satyp alýshy daıyn tehnıkalyq qujat pen nómirlik belgini tıisti habarlama kelgen soń, birneshe saǵattan keıin mamandandyrylǵan HQO-dan óz betinshe ala alady.
«Tótenshe jaǵdaı kezinde elektrondyq úkimet portaly arqyly resimdelgen daıyn qujattar men nómir belgilerin Almaty qalasy Maılın kóshesi, 85 mekenjaıyndaǵy №2 Mamandandyrylǵan HQO-dan alýǵa bolady. Budan basqa, aldyn ala resimdelgen senimhat boıynsha qujattardy jáne memlekettik nómirdi úıge jetkizý qyzmetin paıdalanýyna bolady»,– dedi Jańyl Ápetova.
