Almatylyqtar zeınetkerdi qaǵyp ketken djıp júrgizýshisin izdestirýde
ALMATY. QazAqparat - Áleýmettik jeli paıdalanýshylary 84 jastaǵy Almaty turǵyny Roza Terenkony qaǵyp ketken jol talǵamaıtyn kólik júrgizýshisin izdep jatyr.
Bul oqıǵa jaıly Feısbýk áleýmettik jelisindegi paraqshasynda Elena Bonomanko baıandady. Ol 8 maýsymda Jandosov kóshesiniń boıyndaǵy №36 úıdiń aýlasynda jol talǵamaıtyn kólik júrgizýshisi áıeldi qaǵyp ketkenin aıtty.
«8 maýsymda shamamen saǵat 14.00 Jandosov kóshesiniń boıyndaǵy №36 úıdiń aýlasynda jol talǵamaıtyn kólik basqarǵan jas jigit keıýanany qaǵyp ketti. Jyldamdyqty asyryp, artqa qaraı júrgen. Ol áıeldiń aıqaılaǵanyn estimegen. Abyroı bolǵanda, qarııany basyp ketýge temir qorshaý kedergi keltirgen. Onyń sózine qaraǵanda, jigittiń aty-jóni Robert Pak», - dep jazady E.Bonomanko.
Post avtory jigit týystaryna kelgenin aıtty. Oqıǵadan keıin jigit áıelge «shý shyǵarmaýny» suraǵan.
Jazba avtorynyń aıtýynsha, áıeldiń úsh qabyrǵasy synǵan jáne ózge de jaraqattar alyndy.
«Ol júre almaıdy, túnde jaraqattary aýyryp qınalady. Robert, eger ar-uıatyń bolsa, jigit bolsań, jazańdy tart!», - dep jazdy almatylyq.
