Almatylyqtar ystyqtan qalaı saqtanady
ALMATY. QazAqparat - Aptap ystyǵymen este qalatyn bıylǵy jaz almatylyqtardy ábigerge saldy. Aýa temperatýrasy 42 gradýsqa deıin kóterilse, kólik ishindegi termometrler 52 gradýsty kórsetti. «QazAqparat» tilshileri osyǵan baılanysty qala kóshelerinde jurtshylyqtyń ystyqtan qalaı qorǵanyp júrgenin, osyndaı jaǵdaıda tájirıbe boıynsha qandaı keńes bere alatynyn surap bildi.
Saýaldarǵa jaýap bergenderdiń deni tús ýaqytynda kóshege shyǵýdan bas tartýǵa keńes berse, keıbiri qolshatyr tutynatyndaryn aıtty. Sýdy kóbirek ishý qajet degen almatylyqtar eń durysy taýǵa baryp, «jan saqtaý» kerek ekenin eskertti.
«Men 5-shi qabatta turamyn. Óte qıyn. Kórshilerden «myna ystyqqa qalaı shydap otyrsyńdar?», dep suradym. Olarda salqyndatqysh bar. Sonyń ózinde ystyqqa shydaı almaı otyrǵanyn aıtty. Salqyndatqysh alýǵa aqsham jetpeıdi, sondyqtan, tańsáride qydyramyn. Dymqyl dákeni jamylyp jatamyn. Meniń jasym 74-te. Ystyqta úıden shyqpaýǵa tyrysamyn», - dedi Alısa Felıksova. Jas otbasy Denıs pen Elena kún ystyqta qolshatyrmen shyǵatynyn aıtty.
«Mundaı ystyqta biz az qımyldaýǵa, kóp sý ishýge tyrysamyz. Dárigerlerdiń keńesi boıynsha jalańbas júrmeımiz. Ystyq sháı ishemiz. Úıde jeldetkish bar. Tańerteń erte sýburqaqtar mańynda qydyramyz. Kúndiz shyqpaımyz, keshke jaqyn serýendeımiz. Bizdiń qyzymyzdyń terisi áppaq. Kúnde kóbirek júrip qalyp edik, qyzaryp ketti. Dereý kremder jaǵyp, qutyldyq. Osydan keıin, qolshatyrmen shyǵatyn boladyq», - deıdi jas otbasy Denıs Pantıýshın men Elena Nýreeva.
«Sýdy qaınatyp, salqyndatyp, tosap qosyp iship jan saqtaımyn. Úıde terezelerdi qarańǵylap tastap, aptap ystyqtan saqtanamyz. Vannaǵa túsemiz», - deıdi almatylyq Narıman Sadyqov.
70-ten asqan Marına Mıhaılova qaladaǵy ózen jaǵalarynda demalys oryndaryn jasaý qajet degen usynysyn qala basshylyǵyna jetkizgisi keldi.
«Men qyzymnyń taýdaǵy záýlim úıine baryp demalamyn. Ystyqtan solaı qutylamyn. Qaladaǵa ystyqta shydaý múmkin emes. Osy qyrkúıekte men 74 jasqa tolamyn. Mundaı jasta ystyqtan saqtanbasa bolmaıdy. Men kompotty kóbirek ishemin. Almatylyqtarǵa aıtarym, jeke kólikterińiz bolmasa da, qoǵamdyq kólikpen taýǵa shyǵyp demalyp turyńyzdar. Qala basshylyǵy taý etegine qatynaıtyn birneshe avtobýs baǵdaryn ashsa deımiz. Sosyn, qalany kesip ótetin ózender jaǵasynda adamdar otyratyn alańqaılar jasasa deımiz», - deıdi Marına Mıhaılova.
Buryn qurylysshy bolǵan Serik Ábishev sýdy kóbirek ishý qajet degen keńesin aıtty.
«Nemerelimmen keshqurym salqynda qydyramyz, barynsha sýdy kóbirek ishemiz. Buryn qurylysshy bolǵanmyn, qazir osylaı demalystamyz», -dedi Serik Ábishev.
