Almatylyqtar vırýsty qaıdan juqtyryp jatyr
ALMATY. QazAqparat – Almatylyqtar koronavırýs ınfektsııasyn qoǵamdyq oryndardan juqtyryp jatyr, dep habarlaıdy QazAqparat tilshisi.
Qańtar aıynyń sońǵy 2 aptasynda juqtyrý oryndary belgili boldy.
«Júrgizilgen taldaýǵa sáıkes, adamdar vırýsty qoǵamdyq oryndardan (40.1%), otbasynda KVI–men aýyratyn naýqaspen baılanystan (27.4%), qalalyq kólikten (22.8%), jumysta KVI–men aýyratyn naýqaspen baılanystan (5.6%), shet elderden jáne QR óńirlerinen (2.6%) juqtyryp jatyr. Kóbinese 20 - 39 jas – 34,7%, 40 - 59 jas – 28,7%, 60 jastan joǵary adamdar sany 21,3% bolyp otyr», - dedi ákimdikten.
Qalanyń ınfektsııalyq statsıonarlarynda (1866 tósek) 763 patsıent bar, onyń ishinde 16-sy asa aýyr jaǵdaıda, 141 naýqastyń jaǵdaıy aýyr, 604 adamnyń jaǵdaıy ortasha aýyr, 2 - jeńil.
Almaty ákimi Baqytjan Saǵyntaevtyń tapsyrmasy boıynsha, ekinshi tolqynǵa daıyndyq aıasynda qala boıynsha 7011 oryndyq 23 kovıdti statsıonar (onyń ishinde 250 reanımatsııalyq) daıyndaldy. Emhanalardaǵy medıtsınalyq jabdyqtar jańardy. Eki jańa emhananyń qurylysy aıaqtaldy. Olar 500 tósek-orynǵa arnalǵan ınfektsııalyq gospıtal, 300 tósek-orynǵa arnalǵan modýldik statsıonar. Osylaısha, sońǵy úsh aıda ınfektsııalyq tósek sany eki esege artty.
Sonymen qatar, alǵashqy medıtsınalyq-sanıtarlyq kómek uıymdarynyń jumysy kúsheıtildi. 73 emhanada 298 mobıldi brıgada jumys isteıdi. Medıtsına qyzmetkerleriniń qaýipsizdigi men daıyndyǵyna erekshe nazar aýdaryldy. Jeke qorǵanysh quraldarynyń qory quryldy. Epıdemııaǵa qarsy is-sharalarǵa tartylǵan medıtsına qyzmetkerlerinen basqa 2450 mamannan turatyn kadrlyq rezerv daıyndaldy.
Táýligine 14600 zertteý júrgizetin 23 PTR zerthana jumys isteıdi, bolashaqta 22 700 zertteýge deıin ulǵaıtý múmkindigi bar. Pandemııa bastalǵannan beri Almaty aýmaǵynda ornalasqan zerthanalarda barlyǵy 826 myń PTR zertteý júrgizildi. Sondaı-aq, táýligine 3 056 zertteý ótkizý qýaty bar 12 IFT zerthana jumys isteıdi.
