Almatylyqtar Ulystyń Uly kúnin toılaýda (FOTO)

ALMATY. QazAqparat - Almatylyqtar Ulystyń uly kúnin ulyqtaýda. Ortalyq mádenı jáne demalys saıabaǵy «Naýryz meıramynyń» basty alańyna aınaldy. Búgin saıabaq ishindegi «Spartak» stadıonynda ıne shanshar jer joq. Halyq meıramǵa oraı uıymdastyrylǵan merekelik kontsertti tamashalaýda.

«Naýryz - qashanda halqymyzdyń baı salt-dástúrin ulyqtap, ózara yntymaǵymyz ben bereke-birligimizdi nyǵaıtatyn qasıetti meıram. Naýryz bizdiń naǵyz jańa jylymyz bolýy kerek dep Elbasy atap ótkendeı, táýelsizdik alǵan soń Naýryz meıramy jańǵyrtylyp ótkizilip keledi. Bul dástúrimizdi saqtap, óskeleń urpaqty ulttyq qundylyqtardy baǵalaýǵa shaqyrady. Jalpyhalyqtyq merekege aınalǵan ulystyń uly kúnine el irgesiniń tynyshtyǵy men ilgeri damýynyń arqasynda jettik. Eldegi turaqtylyq pen tutastyq arqasynda ekonomıkamyz jyl saıyn kóterilip, halyqtyń ál-aýqaty artyp keledi. Halyqty áleýmettik qoldaý men ınfraqurylymdy damytý damyldaǵan emes. Bul jumystar turaqty jalǵasyn tabady», - dedi qala ákimi A.Esimov.

Alyp shahardyń turǵyndary men qonaqtaryna kóńildi demalý úshin ınteraktıvti jáne taqyryptyq aımaqtar jasalǵan.

«Qazaq aýyly» etno-rekonstrýtsııasynda «Qazaq handyǵynyń 550 jyldyǵy» taqyrybynda fotokórme, sheberler jármeńkesi, shoý men attraktsıondar, balalar saıabaǵy, dástúrli merekelik taǵam, Memlekettik qýyrshaq teatry ártisteriniń, zoobaq janýarlarynyń sherýi, memlekettik tsırktiń qyzyqty shoýlary, «Sazgen sazy» folklorlyq-etnografııalyq ansambli men ózge de óner juldyzdarynyń kontserti ótti.

Jastar jaǵy kúres, arqan tartys, asyq atý sııaqty ulttyq sporttyq oıyndarda kúsh synap jatsa, búldirshinder asfaltqa qyzyl-jasyl sýret salýmen aınalysýda.

Birneshe jerde qazaqtyń ulttyq merekelik taǵamy - Naýryz kóje taratylýda.

Aıta keteıik, ońtústik astana turǵyndary Naýryz meıramyn kesheden beri atap ótýde. Ár aýdanda, Alataý aýdanynda - ákimdik aldyndaǵy alańda, Almaly aýdanynda - «MEGA PARK» SSO, Áýezov aýdanynda - ákimdik aldyndaǵy alańda, , Bostandyq aýdanynda - «MEGA» SSO, Jetisý aýdanynda - «Aınabulaq» yqsham aýdanyndaǵy skverde, Medeý aýdanynda - Oqýshylar saraıy aldyndaǵy alańda, Túrkisb aýdanynda - Seıfýllın atyndaǵy saıabaqta, Naýryzbaı aýdanynda - №188 orta mekteptiń sport alańynda merekelik sharalar ótýde.

Almatylyqtardyń mereke ótetin jerge barýyna barynsha qolaıly bolýy úshin ortalyq saıabaqqa megapolıstiń segiz aýdanynan 174 avtobýs qatynaýda.