Almatylyqtar Ulystyń uly kúnin barlyq sán-saltanatymen atap ótýde
ALMATY. 21 naýryz. QazAqparat - Naýryzdy Jyldyń basy dep ata-babalarymyz tegin aıtpaǵan. Ony qala ákimi Ahmetjan Esimov búgin Almatyda negizgi sharalary «Astana» alańynda bastalǵan Naýryz meıramy kezinde aıtty.
Shahar basshysy kún men tún teńelip, qalyń qardyń kóbesi sógilip, jylǵalardan sý aǵyp, aǵashtar búr jaryp, jan-janýar uıqysynan oıanatyn bul kezeńdi shyǵys halyqtary Jańa jyl dep sanaıtynyn. Ulystyń uly kúni "Samarqannyń kók tasy da jibıdi" dep bir-birine degen ókpe-renishin umytyp, jyly lebizderin bildirip, jaqsy tilekter tileıtinin, ózderiniń turyp jatqan úılerin, aýlalaryn, kóshelerin retke keltirip, izgi nıetpen aǵash otyrǵyzatynyn tilge tıek etti. Ásem Almatynyń kórkine-kórik qosyp, ajaryn ashatyn mundaı sharalar bıyl da óz jalǵasyn tappaq.
«Ótken jyldy qala qoǵamdyq ómirdiń barlyq salasynda zor jetistiktermen qarsy aldy. Bul bizdiń Naýryz merekesin joǵary deńgeıde atap ótýimizge jaqsy negiz bolyp otyr. Bıylǵy Ulý jyly da qutty, berekeli, tabysty bolyp, barshamyzǵa jaqsylyq ákelsin», - dedi Ahmetjan Esimov.
«Naýryz-2012» merekesiniń negizgi sharalaryn almatylyqtar Alataý aýdanynda - aýdandyq ákimdiktiń aldyndaǵy alańda, Áýezov aýdanynda - «Spýtnık» saýda oıyn-saýyq kesheni mańynda, Almaly aýdanynda - «Astana» alańynda, Bostandyq aýdanynda - «Atakent» iskerlik ortalyǵynda, Jetisý aýdanynda - «Maksıma» saýda ortalyǵy men Aınabulaqta, Medeý aýdanynynda - Shoqan Ýálıhanov alańynda, Túrkisib aýdanynda - Seıfýllın saıabynda atap ótýde. Onda teatrlandyrylǵan qoıylymdar men óner sheberleriniń kontserti qoıylyp, sporttyq oıyndar men jármeńkeler ótýde. Keshke merkeelik ot shashý berilip, mereke jastardyń bı keshine ulaspaq.
