Almatylyqtar TJD qyzmetkerlerine tikeleı suraq qoıa alady

ALMATY. QazAqparat - Almaty qalalyq Tótenshe jaǵdaılar departamenti turǵyndary men barlyq múddeli tulǵalardy dıalogqa shaqyrdy, dep habarlaıdy QazAqparat tilshisi.

Osy oraıda búgin dchs-almaty.kz resýrsynda 15.00-den 17.00-ge deıin onlaın konferentsııa ótedi.

Bul tótenshe jaǵdaılarǵa yqpal etý qyzmetiniń jedeldigi, qol jetimdiligi jáne ashyqtyǵy prıntsıpterin qamtamasyz etý maqsatynda uıymdastyrylmaq.

Osy ýaqyt aralyǵynda kez-kelgen azamat, kásipker TJD ókilderine ózin alańdatqan saýalyn qoıa alady.

Konferentsııada TJD qyzmetiniń jalpy baǵyttaryn sonyń ishinde, Almaty qalasynyń TJD sybaılas jemqorlyqqa qarsy kúres boıynsha qabyldanǵan sharalar týraly aıtylatyn bolady.

«Suraqtaryńyz ben ótinishterińizdi Almaty qalasynyń Tótenshe jaǵdaılar departamentiniń saıtyna jibere alasyzdar. Konferentsııa «suraq-jaýap» rejiminde qashyqtyqtan ótkiziledi. Qoıylǵan suraqtaryńyzǵa jaýap alýdy jedeldetý úshin suraqtyń mánin anyq jáne qysqasha berýińizdi suraımyz», - dedi baspasóz qyzmetinen.

Barlyq suraqtar men ótinishterge jaýaptar bir kúnniń ishinde Almaty qalasy Tótenshe jaǵdaılar departamentiniń saıtynda ornalastyrylatyn bolady.