Almatylyqtar tuńǵysh ret «Dakar 2011» rallı-marafon jarysyna qatysatyn «Astana» avtokomandasyn jolǵa shyǵaryp salýda
ALMATY. Qazannyń 30-y. QazAqparat /Názıra Eleýhan/- Búgin «Astana» avtokomandasy «Dakar 2011» rallı jarysyna qatysýǵa attanady. Olar tuńǵysh ret bul aıtýly dodada kúshterin synamaq. Shyǵaryp salý qazir qala ortasyndaǵy «Astana» alańynda ótip jatyr.
Komandanyń qurmetine elimizdiń eń úzdik avtoklýbtary men avtokólik qulaǵynda oınaıtyn sheber kaskaderler avtoshoý uıymdastyryp, ónerlerin kórsetýde.
Shoý aıaqtalysymen sportshylar «Dakar 2011» jarysyna attanady. Bıyl ol jarys Argentına-Chılı baǵyttary boıynsha ótedi.
Komandanyń kóshbasshysy, pılot Artýr Ardavıchýstyń aıtýynsha, Qazaqstan komandasy básekege túsýge daıyn. "Dakar" jarysyna qatysý bizdiń baıaǵydan bergi armanymyz. 2008 jyly bul rallı-marafon keıinge qaldyrylǵan bolatyn. Endi múmkindigimiz týdy. Biz barlyq jaǵynan sheberligimiz ben múmkindigimizdi kórsetýge, "Astana" atynyń dańqyn asqaqtatýǵa daıynbyz. Birinshiden, bizdiń tájirıbemiz bar, ekinshiden temir tulparlarymyz úlken synǵa saqadaı saı, eń bastysy - jetistikke jetkizetin úmit bar, ol qazaqstandyqtardyń qoldaýy",-dedi Artýr Ardavıchýs.
Komandanyń 12 jyldyq tarıhy bar. Olar óz isiniń naǵyz sheberleri, álemniń kóp elderindegi jarystarǵa qatysyp, kóptegen kýboktar men medaldar jınap úlgergen. Komanda músheleriniń aıtýynsha, ol jarystar eń basty «Dakar» jarysyna deıingi daıyndyq kezeńderi boldy.
«Astana» komandasy quramyna komandanyń dırektory Marat Abyqaev, pılot Artýr Ardavıchýs, shtýrman Denıs Berezovskıı jáne kólik mehanıgi Janat Jalymbetov kiredi.
Qazaqstandyq Avtomotosport federatsııasynyń prezıdenti Bolat Aqtaevtyń aıtýynsha, «Dakar» jarysyna qatysý - aıtýly oqıǵa, ol bizdiń elimizdiń joǵarǵy tehnologııalyq jarys túrlerinen básekege túse alatyndyǵymyzdy bildiredi. "Astana" álemniń eń myqty komandalary qatysatyn jarysqa alǵashqy ret barǵaly otyrǵanymen, aıtýly dodalarda óz kúshin synaǵan myqty komanda. Biz olardyń jetistigine senemiz jáne barlyq qazaqstandyqtardy qoldaýǵa shaqyramyz", -dedi ol.
