Almatylyqtar Terrenkýrda júrip jatqan qurylysqa narazylyq bildirdi
ALMATY. QazAqparat – Áleýmettik jelide Almatyda Terrenkýr aýmaǵynda turǵyn úı kesheni salynatyny týraly jazba jarııalandy. Almaty ákimdigi osyǵan baılanysty túsinik berdi, dep habarlaıdy QazAqparat tilshisi.
Almaty turǵyny Sergeı Chıkın Facebook arqyly jergilikti bılik ókilderine atalmysh qurylysty toqtatýdy surady.
«Terrenkýrda turǵyn úı keshenin salmaqshy ma? Birer apta buryn Terrenkýrda, ıaǵnı, qala turǵyndary serýendeýdi jaqsy kóretin jerde qurylys jumystary bastaldy. Qazirdiń ózinde úlken qorshaý paıda boldy. Ótken jyly jazda 30 sotyq jerdiń 250 mln teńgege satylatyny habarlandyrý saıtynda jarııalandy. Qazir bul ýchaskeniń jańa ıesi bar. Biletin kisilerge suraǵym bar: memlekettik qorda turǵan jer qalaısha jeke menshikke ótti, onyń ústine sý qorǵaý aımaǵynda?», - degen surady post avtory.
Ol sondaı-aq bul jerde basketbol alańy, týrnık, tennıs ústeli bar sport alańyn súrý jumystary jaqynda bastalýy tıis ekenin málimdedi.
«Qurylys alańynyń bir bóligi - irgeles jatqan 16 sotyq jer ýchaskesi boldy, munda úlken záýlim úı súrildi. Demek, 46 sotyq jer - elıtaly taýnhaýs salýǵa óte qolaıly aýmaq bolǵany ǵoı», - dep jazdy Sergeı Chıkın.
Ol sondaı-aq qurylys jumystary ruqsatnsyz júrip jatqanyn málimdedi.
Almaty ákimdigi qurylys jumystary eshqandaı ruqsatsyz júrgizilip jatqanyn málimdedi.
«Bul jer ýchaskesi jeke menshikte. Qurylysqa eshqandaı ruqsat qujattary berilgen joq. Qazirgi ýaqytta sport alańyn saqtaı otyryp, jer ýchaskesin memleket qajettiligine qaıtarý múmkindigi qarastyrylyp jatyr», - degen jaýap keldi ákimdikten.
