Almatylyqtar táýligine qansha sý tutynady
ALMATY. QazAqparat - Almaty turǵyndary úshin táýligine 600 myń tekshe metr sý beriledi, dep jaýap berdi «QazAqparat» tilshisiniń saýalyna «Holdıng Almaty Sý» memlekettik kommýnaldyq kásipornynan.
«QazAqparat» tilshisine atalǵan mekeme qyzmetkerleriniń aıtýynsha, Almaty qalasynyń sý arnalary sý resýrstarymen qamtamasyz etý boıynsha úzdiksiz jumys istep turǵan elimizdegi eń iri júıe.
«Almaty sý arnalary qala turǵyndarymen qatar, iri kásiporyndardy da sýmen turaqty qamtamasyz etip otyr. Almaty qalasy sýdy negizgi tórt arna boıynsha alady. Olar: Úlken jáne Kishi Almaty ózenderi men jer asty sý qorlary jáne Almaty, Talǵar jer qoınaýlaryndaǵy sý arnalary. Dál qazirgi ýaqytta berilip otyrǵan sýdyń 63 paıyzy jer asty sýlarynan alynyp otyr. Sý 150 jáne 500 metr tereńdikten alynady», delingen habarlamada.
Úlken jáne Kishi Almaty ózenderi men Úlken Almaty kólinen alynǵan sýlar tazartylyp, nysandardy tazalaý jumystaryna paıdalanylady.
«Holdıng Almaty Sý» KMK 2017 jyly kásiporyn esebinen 15,8 shaqyrym sýarnasyna jóndeý jumysyn júrgizgeli otyrǵanyn jetkizdi. Qaıta jóndeý jumystary arqyly megapolıstiń 18 myń turǵyny úzdiksiz sýmen qamtamasyz etilmek. Sońǵy 5 jylda atalǵan mekeme óz qarjysy esebinen 146 shaqyrym sýjelisine kúrdeli jóndeý jumystaryn júrgizip, shyǵyndardy azaıtqan.
