Almatylyqtar «Taýgúl» yqshamaýdanynda kópqabatty úı salýǵa qarsy

ALMATY. QazAqparat - «Taýgúl» yqshamaýdanynyń turǵyndary buzylǵan eski úılerdiń ornyna kópqabatty turǵyn úılerdiń salynýyna narazylyq bildirdi, dep habarlaıdy QazAqparat tilshisi.

Jýyrda «Taýgúl» yqshamaýdanynyń turǵyndary kópqabatty úılerdiń salynýyna qarsylyq bildirip, Memleket basshysyna úndeý jasaǵan bolatyn. Osy máselege baılanysty QazAqparat agenttigi qalalyq ákimdikten resmı túsinikteme berýdi surady.

«Almaty» áleýmettik-kásipkerlik korporatsııasy ókilderi túsindirgendeı, Súleımenov, Jandosov jáne Rysqulbekov kóshesiniń boıynda ornalasqan apatty úıler «Almatyda 2021-2025 jyldarǵa arnalǵan turǵyn úı qoryn jańartý baǵdarlamasyna» engizilgen.

«Atalǵan kóshelerdegi úılerdi jańartý jeke ınvestor-salýshymen birlesip júzege asyrylýda. Joba 8 kezeńinen turady. Búginde jobanyń birinshi kezeńindegi qurylys-montaj jumystary bastalyp ketti. Onyń aıasynda 5 apatty úı súrildi, bul 40 páter. 25 otbasy «Almaty» ÁKK» turǵyn úı qorynan bólingen úıge kóshirildi, al 15 otbasy qurylys aıaqtalǵanan keıin óz aýdandaryna oralýdy josparlap otyr», - dep atap ótti ÁKK ókilderi.

Vedomstvanyń habarlaýynsha, 2-8 kezeńge arnalǵan damý tujyrymdamasy áli bekitilgen joq. Ony ázirleý barysynda qoǵamdyq tyńdaýlar ótedi.

«Bul jobaǵa qatysty qoǵamda ekitúrli kózqaras qalyptasty.Tozyǵy jetken úılerdiń turǵyndary eski úıleri buzylyp, jańadan salynýyn qalasa, jaqyn mańdaǵy úılerdiń turǵyndary kópqabatty úılerdiń qurylysyna qarsy. Qazirgi ýaqytta belsendilermen bir ymyraǵa kelý jumystary júrgizilýde», - dep túsindirdi «Almaty» ÁKK.

Buǵan deıin 2022 jyly Almatyda 278 páterlik 32 apatty úı buzylatyny týraly jazǵan bolatynbyz.