Almatylyqtar Sport kúnin atap ótti
ALMATY. QazAqparat - Almatyda «Alataý» dástúrli óner teatrynda Sport kúnine arnalǵan merekelik shara ótti. Sport salasynyń damýyna úles qosqan azamattarǵa qurmet kórsetildi, dep habarlaıdy QazAqparat.
Almaty qalasy dene shynyqtyrý jáne sport basqarmasynyń basshysy Ábil Dóńbaev halyqaralyq jáne respýblıkalyq dodalarda Almatynyń namysyn qorǵaıtyn sportshylar men eńbegi sińgen bapkerlerdi, osy salanyń damýyna belsendi at salysyp júrgen BAQ ókilderin quttyqtap, alǵys hatpen marapattady.
«Qurmetti sportsúıer qaýym, sizderdi sport merekesimen quttyqtaımyn! Qala turǵyndarynyń salamatty ómir saltyn ustanýyna, sportshylarymyzdyń jańa belesterdi baǵyndyrýyna qosqan úlesterińizge alǵys aıtamyz»,- dep Ábil Dóńbaev óz quttyqtaýyn jetkizdi.
Sonymen qatar, ol ótken jarty jyldyqqa zer salyp, Almaty qalasy dene shynyqtyrý jáne sport salasynyń damýyn saralap, kún tártibindegi ózekti máseleler men aldaǵy josparlardy talqylady.
«Nursultan Nazarbaev atap ótkendeı, «Deni saý ult básekege qabiletti bolady», sondaı-aq, Elbasy óz Joldaýynda 2020 jylǵa deıin Qazaqstan xalqynyń 30%-yn buqaralyq sportqa tartý týraly aıtyp ketken bolatyn. Búginde, Almaty qalasynyń bul maqsatqa erterek qol jetkizýge múmkindigi barshylyq. Ótken jyldyń sońynda, statıstıkalyq málimetke sáıkes, dene shynyqtyrý men sportpen aınalysatyndar sany 29 %-dy qurady», - dep atap ótti óz baıandamasynda Ábil Beketuly.
Merekelik sharaǵa 800-ge jýyq sportshy qatysty. Marapattalǵan BAQ ókilderi arasynda QazAqparat tilshisi Almas Muqashuly da basqarma basshysynyń Alǵys hatyn ıelendi.
