Almatylyqtar «Saıran» vokzaly mańyndaǵy taksı júrgizýshilerine shaǵymdandy
ALMATY. QazAqparat – «Saıran» avtovokzalynyń mańynda turatyn almatylyqtar kúndiz-túni jurttyń mazasyn alatyn taksısterge shaǵymdandy, dep habarlaıdy QazAqparat tilshisi.
Áýezov aýdany ákiminiń esep berý jıyny barysynda, aýdan turǵyndarynyń biri ákimge saýal joldady. Onyń aıtýynsha, vokzal mańynda turatyn taksıster klıentterdi jınap, kúndiz-túni maza bermeıdi. Ol ákimnen shýly taksı júrgizýshilerge qatysty máseleni sheship berýin surady.
«Tastaq» pen «Saıran» aýmaǵynda bul másele únemi kóterilip otyrady. Ótken jyly bizdiń qyzmetkerler Almaty qalalyq Polıtsııa departamenti jáne qalanyń mobıldilik basqarmasymen birlesip aptasyna 2-3 ret reıdtik is-sharalar ótkizdi. Nátıjıesinde 100-den astam júrgizýshi ákimshilik jaýapkershilikke tartyldy. Qazir avtovokzal mańynda taksı júrgizýshileri joq. «Saıran» kóliniń mańynda da turmaıdy. Biraq, olar qazir kóbinese aýlalarda júredi. Osyǵan oraı, endi bul suraqqa Áýezov aýdandyq polıtsııa bastyǵy jaýap beredi», - dedi Áýezov aýdanynyń ákimi Saıran Saıfedenov.
Óz kezeginde, aýdandyq polıtsııa basqarmasynyń bastyǵy bul másele erekshe baqylaýǵa alynatynyn atap ótti. Profılaktıkalyq jumys turaqty túrde júzege asyrylady.
