Almatylyqtar saılaý ýchaskelerine arnaıy qosymshalardyń kómegimen bara alady

ALMATY. QazAqparat - Almatylyqtar saılaý ýchaskelerine 2GIS jáne Yandex Maps kartasy qosymshalarynyń kómegimen bara alady. Bul týraly Óńirlik kommýnıkatsııalar qyzmetiniń baspasóz brıfınginde aýmaqtyq saılaý komıssııasynyń tóraǵasy Janna Asanova aıtty, dep habarlaıdy QazAqparat tilshisi.

Spıkerdiń sózinshe, daýys berý oryndary kartada belgilenegen.

«Qazirgi tańda saılaý ýchaskeleriniń mekenjaılaryn tanymal 2GIS, Yandex Maps qosymshalaryna engizý jumystary júrgizilýde. Jumys aıaqtalýǵa jaqyn. Saılaý kúni jaqyndaǵan kezde kez kelgen saılaýshy óz saılaý ýchaskesiniń geolokatsııasyn taba alady», - dedi Janna Asanova.

Aıtýynsha, qazirgi ýaqytta megapolıste 531 saılaý ýchaskesi ashyldy.

«Saılaý ýchaskeleriniń meken-jaıy kórsetilgen tolyq tizim «Vechernıı Almaty» jáne «Almaty aqshamy» gazetteriniń baspa nusqalarynda, olardyń saıttarynda, sondaı-aq Almaty qalasy ákimdiginiń saıtynda jarııalanǵan», - dedi ol.

Sonymen qatar, Almatyda óz saılaý ýchaskesin tekserý úshin «1315» biryńǵaı nómir quryldy. Barlyq uıaly baılanys operatorlarynyń abonentteri úshin qońyraý shalý tegin. Call-ortalyqtyń jumys ýaqyty – demalys kúnderin qosqanda kún saıyn 8.00-den 20.00-ge deıin.

«Almaty qalasy ákimdiginiń «Open Almaty» qoǵamdyq qabyldaý saıtynda jáne bilim basqarmasynyń memlekettik qyzmetter portalynda saılaýshylar tizimderinen ózińizdi tekserýge múmkindik beretin servıs qoljetimdi. Zaǵıp saılaýshylar úshin arnaıy trafaretter daıyndalady. Sondaı-aq erekshe qajettilikteri bar adamdarǵa arnalǵan buryshtar jabdyqtalady: beınerolıkter, aqparattyq materıaldary bar aýdıo rolıkter jáne múgedekter arbasyna kirýge arnalǵan keńeıtilgen oryndar»,- dedi spıker.