Almatylyqtar saıası qýǵyn-súrgin jáne asharshylyq qurbandarynyń rýhyna taǵzym etti

ALMATY. QazAqparat – Almatyda zııaly qaýym ókilderi saıası qýǵyn-súrgin qurbandaryn eske alyp, jazyqsyz jalanyń qurbandaryna quran baǵyshtady. Qala ákimi Erbolat Dosaev 1931-33 jyldardaǵy asharshylyq qurbandaryna arnalǵan eskertkishke gúl shoqtaryn qoıdy, dep habarlaıdy QazAqparat tilshisi.

Qaraǵaıly saıabaǵynada ótken is-sharaǵa saıası qýǵyn-súrgin jáne asharshylyq qurbandarynyń týystary men jaqyndary, mádenıet qaıratkerleri, qoǵam ókilderi men qala turǵyndary qatysty. Olar qaza bolǵandardy bir mınýt únsizdikpen eske alyp, eskertkishke gúl shoqtaryn qoıdy.
Jınalǵandar qaıǵyly oqıǵalardy este saqtap, saıası qýǵyn-súrgin qurbandaryn aqtaý boıynsha jumysty jalǵastyrý qajettigin atap ótti. Qazaqstannyń bostandyǵy men táýelsizdigi úshin qandaı qurbandyqtyń bolǵanyn jáne olardy ulyqtaý qanshalyqty mańyzdy ekenin de tilge tıek etti.

Túrli málimetter boıynsha, ótken ǵasyrdyń 30-shy jyldarynyń basynda 3 mln-ǵa jýyq qazaqstandyq jappaı asharshylyqtyń qurbany boldy, 100 myńnan astam adam qýǵyn-súrginge ushyrady, 25 myńnan astam adam atyldy.
Qýǵyn-súrginnen Qazaqstannyń kórnekti ǵylym jáne mádenıet qaıratkerleri - Ahmet Baıtursynov, Álıhan Bókeıhanov, Myrjaqyp Dýlatov, Muhamedjan Tynyshpaev, Maǵjan Jumabaev, Sáken Seıfýllın jáne basqalar zardap shekti.
Almaty ákimdiginiń málimetinshe, búgin qalada túrli estelik is-sharalar, sonyń ishinde «dóńgelek ústelder» formatyndaǵy konferentsııalar, tarıhı-aǵartýshylyq dárister, teatrlandyrylǵan qoıylymdar, kitaphanalarda foto jáne kitap kórmeleri, jastardyń zııaly qaýym ókilderimen kezdesýleri uıymdastyrylady.