Almatylyqtar saıabaq ornyna 13 qabatty turǵyn úı keshenin salýǵa qarsy
ALMATY. QazAqparat - Gagarın dańǵylynyń boıyndaǵy turǵyndar sol mańda júrgiziletin qurylys nysanyna narazy. Jurtshylyq shaǵyn saıabaq aımaǵynyń ornyna jeke qurylys salýshynyń 13 qabatty turǵyn úı keshenin turǵyzýǵa sheshim qabyldaǵanyn aıtty, dep habarlaıdy QazAqparat tilshisi.
Esep berý jıyn barysynda Gagarın dańǵylynyń turǵyndary Bostandyq aýdanynyń ákimi Altaı Rahymbetovten «Komfort» jáne «Gagarin Park» turǵyn úı kesheniniń ortasyna 13 qabatty turǵyn úı salýǵa ruqsattyń bar-joǵyn surady. Olardyń aıtýynsha, bul jerde saıabaq salý josparlanǵan. Qazir bul mańda qarapaıym jurtshylyq serýendeıtin jer joq.
«Rasymen osy turǵyn úı keshenderiniń arasynda bos jer bar. Bul ýchaske jeke menshikke tıesili. Ol munda kópqabatty turǵyn úı salýǵa ótinish bildirdi. Osyǵan baılanysty biz bul máseleni sáýlet jáne qala qurylysyn baqylaý basqarmasymen birge qarap jatyrmyz. Áli de onda ne salýǵa bolatynyn aqyldasamyz. Eger qandaı da bir sheshim qabyldanǵan jaǵdaıda nysan barlyq qurylys talptaryna sáıkes bolýy kerek. Sonymen qatar, turǵyndardyń múddesi eskeriledi», - dep jaýap berdi aýdan ákimi.
Ol Memleket basshysy men qala ákiminiń tapsyrmasy boıynsha ár nysandy salý máselesi muqııat qaralatyndyǵyn atap ótti.
« Bul másele jan-jaqty zertteletin bolady. Naqty sheshimdi turǵyndarǵa jetkizetin bolamyz», - dedi Altaı Rahymbetov.
