Almatylyqtar sanaqqa onlaın formatta qatysa alady

ALMATY. QazAqparat- Almatylyqtar sanaqqa onlaın formatta qatysa alady. Bul týraly onlaın brıfıng barysynda qalalyq statıstıka departamentiniń basshysy Aıdar Ábildabekov málim etti, dep habarlaıdy QazAqparat tilshisi.

Onyń aıtýynsha, bıyl sanaqty ótkizý úshin sharttyq negizde aýdan, ýchaske boıynsha ýákilder, nusqaýshy-baqylaýshylar, tirkeýshiler men ıntervıýerler retinde 3412 adam qatysady.

Halyq sanaǵynyń daıyndyq kezeńine 1-30 maýsym aralyǵynda Almaty qalasy boıynsha 48 nusqaýshy-baqylaýshy men 618 tirkeýshi qatysady.

Intervıýerler adamdardyń mekenjaıy men sanyn naqtylaý úshin barlyq turǵyn jáne turǵyn emes úı-jaılardy aralaıdy.

«Intervıýerde tıisti mórmen rastalǵan kýálik, aınalyp ótýge jatatyn obektilerdiń tizimi bar mobıldi qosymshasy bar planshet, sondaı-aq 2021 jylǵy Ulttyq sanaqtyń sımvoly bar kók tústi bókebaı pen portfel bolady. Intervıýer týraly qosymsha aqparatty sanaq.gov.kz saıtynan bilýge bolady. Onda respýblıka boıynsha ıntervıýerdiń tegi, aty, ákesiniń aty men onyń kýáliginiń nómiri kórsetilgen tizim jarııalanady», – dedi Aıdar Ábildabekov.

1 qyrkúıekten 15 qazanǵa deıingi sanaqta negizgi ekpin mamandandyrylǵan ınternet-resýrstar arqyly sanaqtyń onlaın rejımde ótýine baılanysty sanaq.gov.kz,e-gov.kz táýlik boıy qoljetimdi bolady.

Osylaısha sanaq barlyǵyna yńǵaıly bolady.

Bul degenimiz – qala turǵyndary qaı jerde ornalasqanyna qaramastan, ózderine jáne otbasy múshelerine sanaq paraqtaryn toltyra otyryp, protsedýradan óz betinshe óte alady.

Sonymen qatar, óz betinshe ótken árbir adam telefonǵa SMS-habarlama alady, bul onyń sanaqqa qatysýyn rastaıdy.

Dástúrli jappaı aralaý 1-30 qazan aralyǵynda sanıtarlyq normalardy saqtaı otyryp, onlaın-rejımde sanaqtan ótpegen respondentter arasynda ótkiziletin bolady.

«Sanaqshylar úılerdi aralaıdy, olardyń árqaısysynda derekterdi jınaý men óńdeýdi tezdetetin elektrondy planshet bolady. Bul adam faktorynyń derekter sapasyna áserin azaıtýǵa, JSN qoldaný arqyly anyqtyq deńgeıin arttyrýǵa jáne aqparattyń qaıtalanýyn boldyrmaýǵa múmkindik beredi», - dep naqtylady departament basshysy.

Planshetterge mobıldi qosymshalar júkteledi, onyń kómegimen ıntervıýer jikteýishter men anyqtamalyqtardy qoldana otyryp, salynǵan barlyq arıfmetıkalyq-logıkalyq baqylaýlardy eskerip, saýalnama júrgizedi.

Alynǵan málimetter tikeleı jalpy málimetter bazasyna jiberiledi. Derekter zańnama talaptaryna saı qupııa bolady.