Almatylyqtar Reseı naryǵyna Qostanaı arqyly shyǵa alady - Arhımed Muhambetov
QOSTANAI. QazAqparat - Almaty jáne Qostanaı oblystary ózara áriptestik týraly memorandýmǵa qol qoıdy, dep habarlaıdy QazAqparat tilshisi.
Almaty oblysynyń ákimi Amandyq Batalov Qostanaıǵa jumys saparymen keldi. Maqsaty - Qostanaı oblysynyń ınvestıtsııalyq áleýetimen tanysý, ekijaqty tájirıbe almasý. Áýeli, almatylyq meımandar «Baıan Sulý» kondıter fabrıkasyna bardy. Bıyl atalǵan fabrıka eksport kólemin edáýir ulǵaıtqan. Byltyr munda eki iri tseh iske qosylyp, «ALBO» konfeti jáne shokoladpen oralǵan pechene shyǵaryla bastady.
«Baıan sulý» basshysy Tımýr Sadyqov aıtqandaı, búginde ónimniń 40 paıyzy eksportqa shyǵarylady. Ázerbaıjan, Reseı, Ózbekstan, Tájikstan, Qyrǵyzstan, Mońǵolııa, Túrikmenstan, Germanııa elderinde «Baıan sulýdyń» kámpıtterine suranys joǵary. Sonymen qatar jelilerdi jańartyp, zamanaýı tehnologııalardy óndiriske engizý eńbek ónimdiligin arttyrǵan. Fabrıkanyń jumysyn joǵary baǵalaǵan Amandyq Batalov Taldyqorǵan qalasynda «Baıan Sulý» fabrıkasynyń dúkenin ashýdy usyndy.
Oblystyq fılarmonııada ótken jıynda Arhımed Muhambetov Qostanaı oblysynyń ınvestıtsııalyq jetistikterin baıan etti.
«Almaty oblysynda 6 ındýstrııalyq aımaq bar. Olardan úırenerimiz kóp. Qostanaı oblysynda sońǵy jyldary 89 jańa óndiris oshaǵy ashyldy. 660 mlrd teńgeniń ónimin shyǵardyq. Sonyń nátıjesinde 5,5 myń turaqty jumys orny ashyldy. Bizdiń oblys argarly-ındýstrııalyq baǵytta kóptegen jetistikterge jetti. Búginde ishki jalpy ónim kórsetkigi 25 paıyzǵa jetti. Óndiristi qaıta óńdeý salasy 54 paıyzǵa teń. Osy tusta Qostanaı jáne Almaty oblystarynyń ındýstrııalyq aımaqtary arasynda baılanys ornatýdy usynamyn. Almatylyqtar Reseı naryǵyna Qostanaı arqyly shyǵa alady. Atap aıtqanda, Sverdlov jáne Chelıabi oblystaryna taýar jóneltý qıynǵa soqpaıdy», - dedi Arhımed Muhambetov.
Sonymen qatar, Arhımed Muhambetov jańadan salynyp jatqan Nurkent qalasyn jan-jaqty qoldaýǵa ázir ekenin aıtty. Ásirese, Qostanaı oblysy jańa qalaǵa avtokólik túrlerin jetkizýge nıetti.
«Men Arhımed Muhambetovtiń usynystaryn tolyqtaı qoldaımyn. Bizdegi «Qorǵas - Shyǵys qaqpa» arnaıy ekonomıkalyq aýmaǵy qarqyn alyp keledi. Qazirgi kezde jergilikti atqarý organdary jańa óndiris oryndaryn jumys kúshimen qamtamasyz etý úshin jumys istep jatyr. Qostanaılyq kásipkerler bizdiń aımaqqa kelip, ınvestıtsııalyq jobalaryn iske asyra alady. Óıtkeni, biz Qytaı jáne Qyrǵystan naryǵyna shyǵa alamyz», - dedi Amandyq Batalov.
Ekonomıkalyq jaǵynan áleýetti qos óńir ózara áriptestikke kelisip, memorandýmǵa qol qoıdy. Nátıjesinde, Almaty oblysy Qostanaıdan «Belarýs» markaly 50 shaqty traktor, «SaryarqaAvtoProm» zaýytynan 35 avtobýs satyp almaq. Atalǵan tehnıkalar lızıng arqyly iske asýy múmkin. 
